Türkmenistanyň Prezidenti Gazagystan Respublikasynyň Prezidentine gynanç bildirdi
Türkmenistanyň Prezidenti Serdar Berdimuhamedow Gazagystan Respublikasynyň Prezidenti Kasym-Žomart Tokaýewe ýurduň Mangistau welaýatynda geçirilen harby türgenleşigiň dowamynda bolup geçen, adam pidalaryna we şikeslere sebäp bolan pajygaly waka zerarly gynanç hatyny iberdi.
Döwlet Baştutany şu kyn pursatda gurban bolanlaryň dogan-garyndaşlaryna hem-de ýakynlaryna Türkmenistanyň halkynyň we Hökümetiniň adyndan, şeýle hem hut öz adyndan ýürekden gynanjyny we medet beriji sözlerini, ejir çekenlere bolsa tiz wagtda sagalmaklary baradaky dileglerini beýan etdi.
Pajygaly waka 24-nji sentýabrda Hazar deňziniň kenarynda Harby-deňiz güýçleriniň türgenleşigi wagtynda bolup geçdi. Howa şertleriniň birden ýaramazlaşmagy we güýçli tupanly şemal sebäpli 17 harby deňizçini tolkunlar açyk deňze alyp gitdi. Olaryň üçüsini halas etmek başartdy, 14 adam bolsa aradan çykdy. Harby gullukçylaryň aradan çykmagy bilen baglylykda, Gazagystanda 25-nji sentýabrda umumymilli matam güni yglan edildi. Ýurt boýunça döwlet baýdaklary düşürildi we güýmenje çäreleri ýatyryldy.
