Huawei öz HarmonyOS ulgamynyň esasynda ilkinji stol kompýuterini tanyşdyrdy
Huawei kompaniýasy ilkinji gezek özüniň HarmonyOS operasion ulgamynda işleýän HM650 stol kompýuterini görkezdi. Täze enjam Huawei Connect 2026 tehnologiýa konferensiýasynda tanyşdyryldy. Model ýörite korporatiw pudak we ofis işi üçin işlenip taýýarlanyldy, onuň resmi satuwa çykarylyşy bolsa sentýabr aýyna meýilleşdirilýär.
HM650 modeliniň esasy aýratynlygy HarmonyOS V1.0 operasion ulgamynyň ulanylmagydyr. Kompýuter howpsuzlyk we ygtybarlylyk boýunça ikinji derejeli sertifikasiýadan üstünlikli geçdi, bu bolsa ony gizlin maglumatlary işlemek üçin goragly çözgüde öwürýär. Ulgamda emeli aň gurallarynyň giň toplumy ýerleşdirildi: algoritmler mazmun döretmäge, zerur maglumatlary çalt gözlemäge we maglumatlary seljermäge kömek edýär. Korporatiw maglumatlaryň goragyny iri dil modelleri we ulgam howpsuzlygynyň çuňlaşdyrylan mehanizmleri üpjün edýär.
IT bölümleri we biznes üçin amatly bolmagy maksady bilen kompýuterde iş giňişliklerini sanly bölmek funksiýasy ornaşdyryldy. Enjamlar tora birikdirilende zerur goşundylary we howpsuzlyk sazlamalaryny awtomatiki ýükläp bilýär. Bu bolsa tutuş ofis infrastrukturasyny dolandyrmagy ýeňilleşdirýär.
Kompýuter ekosistemasynyň ösüşi ýokary depginler bilen dowam edýär. Häzirki wagtda HarmonyOS katalogynda 50 000-den gowrak goşundy bar. Olaryň 19 000-den gowragy ýörite şu operasion ulgam üçin döredildi. Şeýle hem ulgam 3300-den gowrak sanly hyzmatyň işlemegini goldaýar. Täze kompýuteriň çykarylmagy Huawei kompaniýasynyň programma üpjünçiligi we enjam çözgütleri babatda doly garaşsyz ulgama geçmeginde möhüm ädim boldy.
ORIENT
