Pezeşkian: Eýran özara hormat goýmak esasynda dialoga we hyzmatdaşlyga taýýar
Eýran düşünişmezlikleri çözmegiň we sebit hem-de halkara howpsuzlygyny pugtalandyrmagyň esasy hökmünde dialogy we hyzmatdaşlygy goldaýar. Eýranyň Prezidenti Masud Pezeşkian çarşenbe güni BMG-niň Baş Assambleýasynyň 81-nji sessiýasynyň umumy çekişmelerinde çykyş edip, Tähranyň gepleşiklere taýýardygyny, ýöne öz özygtyýarlylygyna we kanuny bähbitlerine hormat goýulmagyna garaşýandygyny aýtdy.
Pezeşkianyň sözlerine görä, halkara tertibi adalatlylyga, mertebä, hukuklaryň deňligine we ähli döwletleriň özygtyýarlylygyna hormat goýulmagyna esaslanmalydyr.
Ol Eýranyň özüni goramak mümkinçiliklerine milli howpsuzlygy üpjün etmegiň we daşarky howplaryň öňüni almagyň möhüm faktory hökmünde garaýandygyny belläp, şol bir wagtyň özünde agdyklyk etmäge we howpsuzlygy birtaraplaýyn üpjün etmäge ymtylmak esasynda gurlan çemeleşmelere garşy çykyş edýändigini aýtdy.
Pezeşkian Eýranyň ýadro meselesine we Palestina meselesine dürli çemeleşmeleriň Ýakyn Gündogarda durnuklylygy saklamak boýunça tagallalary çylşyrymlaşdyryp biljekdigi barada hem alada bildirdi. Onuň sözlerine görä, dawalaryň we çözülmedik gapma-garşylyklaryň dowam etmegi sebit howpsuzlygy üçin goşmaça töwekgelçilikleri döredýär.
Eýranyň Prezidenti harby usullaryň halkara hukugynyň, diplomatiýanyň we syýasy dialogyň ornuny tutup bilmejekdigini nygtady. Ol sebit hyzmatdaşlygyny ösdürmäge we umumy howpsuzlygy üpjün edip biljek çözgütleri gözlemäge çagyrdy.
CCTV+ agentliginiň habar bermegine görä, Pezeşkian Eýranyň dialoga we hyzmatdaşlyga taýýardygyny tassyklap, diplomatik serişdeleriň, özara hormatyň we deňhukukly özara gatnaşyklaryň möhümdigini nygtady.
