Maskyň çaklamasy: «On ýyldan dünýäde bir milliard robot, ýigrimi ýyldan bolsa 10 milliard robot bolar»
Ilon Maskyň pikiriçe, emeli aň we adam şekilli robotlar ýakyn onýyllyklarda diňe aýry-aýry pudaklary üýtgetmek bilen çäklenmän, zähmet, bilim we gündelik durmuş baradaky adaty düşünjeleri hem düýpli özgertmäge ukyply. Telekeçi Ilon Mask Hytaý media toparyna (CMG) beren interwýusynda Hytaýda emeli aňyň ösüşi baradaky garaýyşlaryny paýlaşdy we robot tehnikasynyň geljegi barada uly möçberli çaklamalary etdi.
Sişenbe güni Kaliforniýanyň Kremniý jülgesinde ýerleşýän Teslanyň inženerçilik ştab-kwartirasynda geçirilen interwýusynda Mask hytaý emeli aň modelleriniň, aýratyn-da hytaý kompaniýalarynyň ygtyýarynda bolan has çäkli hasaplaýyş serişdelerini nazara alanyňda, ýokary öndürijiligi görkezýändigini aýtdy.
«Hytaýyň emeli aň modelleri, umuman alanyňda, hakykatdan-da örän ýokary derejede. Muny, esasanam, emeli aň bilen meşgullanýan hytaý kompaniýalarynyň çäkli hasaplaýyş kuwwatyny nazara alanyňda, intellekt derejeleriniň reýtinglerinden görmek bolýar — olaryň öndürijiligi örän ýokary. Meniň pikirimçe, Hytaý hasaplaýyş serişdeleriniň her bir birligine düşýän öndürijilik boýunça iň gowy netijeleri görkezýär. Öň hem köpçüligiň öňünde aýdyşym ýaly, Hytaýyň hasaplaýyş kuwwatynyň çäkliligine degişli meseläni köp adamyň garaşyşyndan has tiz çözjekdigine ynanýaryn. Meniň takmynan çaklamalaryma görä, Hytaý litografiýanyň we mikroçipleriň önümçiliginiň kömegi bilen hasaplaýyş çäklendirmeleri meselesini takmynan iki-üç ýylyň içinde çözer» diýip, Mask aýtdy.
Telekeçi adam şekilli robotlara bolan gyzyklanmanyň çalt artýandygyny hem belläp, olaryň geljekde ulanylyşy baradaky garaýyşlaryny paýlaşdy. Onuň çaklamasyna görä, ýakyn on ýylyň dowamynda dünýäde şeýle enjamlaryň takmynan bir milliardy peýda bolup biler.
«Meniň pikirimçe, 10 ýylyň dowamynda azyndan bir milliard adam şekilli robot bolar, belki-de, ondan hem köp bolar. Olaryň sanynyň artmagyny dowam etdirjekdigini pikir edýärin. Eger olaryň sanynyň her ýylda takmynan iki esse artýandygyny çaklasak, onda bu takmynan her üç-dört ýyldan on esse köpelmegi aňladýar. Mysal üçin, 15 ýyldan 10 milliard robot, 20 ýyldan bolsa 100 milliard robot bolar» diýip, Mask aýtdy.
Ol mümkin bolan geljegi C-3PO we R2-D2 ýaly robotlaryň adamlaryň aýrylmaz hemralaryna öwrülen «Ýyldyzlar söweşi» dünýäsine meňzetdi.
«C-3PO we R2-D2 ýaly dostlukly we peýdaly robotlaryň bolan “Ýyldyzlar söweşini” göz öňüne getiriň. Her kimiň öz şahsy C-3PO we R2-D2 ýaly robotlary bolsa, bu ajaýyp bolmazmy? Ýöne has öndürijilikli robotlaryň bolmagy has-da gowy bolardy. Olar garry ene-atalara seredip, hossar bolup we çagalara gözegçilik edip ýa-da mugallym, çagaňyz üçin şahsy mugallym bolup, göz öňüne getirip biljek islendik işiňizi ýerine ýetirip bilerdiler» diýip, ol aýtdy.
Maskyň sözlerine görä, robotlaryň we emeli aňyň giňden ýaýramagy aýry-aýry adamlaryň öndürijiligini ep-esli ýokarlandyryp biler. Ol geljekde bir adamyň ýüzlerçe, hatda müňlerçe fiziki we sanly roboty dolandyryp biljekdigini çaklady. Munuň bolsa, öz gezeginde, girdeji derejesi örän ýokary bolan jemgyýetiň döremegine getirip biljekdigini aýtdy.
«Meniň pikirimçe, her kimiň öz şahsy robotynyň boljak geljekde ýaşamak hemmeleriň isleýän zadydyr. Şonda, meniň pikirimçe, bir adamyň ýüzlerçe, belki-de, müňlerçe fiziki we sanly roboty dolandyrýan köp sanly kompaniýasyny göreris. Şeýlelikde, bir adamyň öndürijiligi ep-esli ýokarlanar. Men geljekde hakykatda ähli adamlaryň girdejisiniň ýokary boljakdygyny çaklaýaryn. Aslynda, geljekde puluň ähmiýetiniň boljakdygy hem maňa düşnüksiz» diýip, ol sözüni dowam etdirdi.
Maşynlaryň işleriň ep-esli bölegini ýerine ýetirip biljek dünýäsinde adamyň orny barada aýdyp, Mask giň gerimli bilimiň we umumy bilimleriň möhümdigini nygtady. Onuň sözlerine görä, emeli aň üçin wezipeleri dogry kesgitlemek we täze tehnologiýalaryň mümkinçiliklerinden netijeli peýdalanmak üçin adama dürli bilim ugurlaryna gowy düşünmek zerur bolar.
«Bilim babatynda meniň maslahatym — sungaty we ylmy, inženerçiligi, giňişleýin umumy bilimleri öz içine alýan mümkin boldugyça giň bilim almak. Robotlardan näme soramalydygyny bilmek üçin soraglary dogry düzmegi başarmaly. Iň giň umumy bilimlere eýe bolsaňyz, soraglary has gowy düzüp bilersiňiz ýa-da muňa “operasion inženerçiligi” diýilýär. Ýöne öz islegleriňizi robota ýetirmeli» diýip, Mask aýtdy.
CCTV+ agentliginiň habar bermegine görä, Ilon Mask emeli aňyň we adam şekilli robotlaryň çalt ösjekdigini çaklaýar. Onuň pikirine görä, olar adamyň zähmetini, bilimini we gündelik durmuşyny düýpli üýtgedip biler.
