Türkmenistanda Günorta Koreýanyň LS Cable & System kompaniýasy bilen bilelikde optiki-süýümli kabelleriň önümçiligi ýola goýlar
Türkmenistanda optiki-süýümli kabelleri öndürýän täze kärhana gurlar. Taslama Günorta Koreýanyň «LS Cable & System Ltd.» kompaniýasy bilen uzak möhletleýin hyzmatdaşlygyň çäklerinde durmuşa geçiriler.
Degişli Özara düşünişmek hakyndaky Ähtnama «Türkmenaragatnaşyk» agentligi bilen koreý öndürijisiniň arasynda 15-nji sentýabrda Seulda gol çekildi. Resminama ýerli önümçilikde kabel öndürmegi ýola goýmagy, ýokary tehnologiýalary geçirmegi we tehniki goldaw bermegi göz öňünde tutýar. Mundan başga-da, taraplar magistral telekommunikasiýa torlaryny bilelikde gurmak we döwrebaplaşdyrmak boýunça iş alyp bararlar.
Täze desganyň işe girizilmegi sanly ykdysadyýeti ösdürmek boýunça döwlet maksatnamalarynyň durmuşa geçirilmegine möhüm goşant goşar. Optiki-süýümli kabelleriň öz önümçiliginiň ýola goýulmagy aragatnaşyk ulgamynyň döwrebaplaşdyrylmagyny çaltlandyrar, internetiň hilini ýokarlandyrar we Türkmenistanyň halkara ugurlardaky esasy telekommunikasiýa merkezi hökmündäki ornuny berkitmäge ýardam eder.
ORIENT
