Aşgabat we Moskwa ykdysady hyzmatdaşlyk boýunça Hökümetara toparynyň 14-nji mejlisine taýýarlanýar
18-nji sentýabrda, anna güni geçirilen Ministrler Kabinetiniň mejlisinde Moskwada geçiriljek Türkmenistanyň we Russiýa Federasiýasynyň ykdysady hyzmatdaşlyk boýunça hökümetara toparynyň nobatdaky 14-nji mejlisine taýýarlyk meselelerine garaldy. Mejlisiň öňünde durýan gün tertibi we toparyň türkmen böleginiň düzümi baradaky teklipler bilen wise-premýer Nökerguly Atagulýew çykyş etdi.
Öňde boljak gepleşikleriň tapgyry iki döwletiň strategik hyzmatdaşlygynyň ähli ugurlaryny öz içine alar. Taraplaryň üns merkezinde özara söwdanyň möçberlerini artdyrmak we ýangyç-energetika toplumynda, senagatda, oba hojalygynda, maliýe-bank ulgamynda, sanlylaşdyrmakda hem-de gümrük dolandyryşynda gatnaşyklary çuňlaşdyrmak meseleleri bolar. Yklymyň esasy logistika ugurlarynyň kesişýän ýeri bolan ulag-aragatnaşyk ugry aýratyn ähmiýete eýe bolar. Duşuşygyň gün tertibine ynsanperwer gatnaşyklary giňeltmek, ylym, bilim, ekologiýa, medeniýet we sport ulgamlarynda bilelikdäki taslamalary durmuşa geçirmek, şeýle hem telekeçilik düzümleriniň ugry boýunça göni dialogy ýola goýmak meseleleri hem girýär.
Prezident Serdar Berdimuhamedow Russiýa Federasiýasy bilen gatnaşyklarynyň dostlukly we strategik häsiýetini nygtady. Döwlet Baştutany toparyň türkmen tarapynyň düzümi baradaky teklibi makullap, Moskwada gepleşikleriň üstünlikli geçirilmegi üçin ähli meseleleriň ýokary hilli we çuňňur öwrenilmegini üpjün etmegi tabşyrdy.
