Türkmenistan ilkinji gezek GDA-nyň Parlamentara Assambleýasynyň mejlisini kabul eder
2026-njy ýylyň güýzünde Türkmenistan ilkinji gezek Garaşsyz Döwletleriň Arkalaşygynyň (GDA) Parlamentara Assambleýasynyň (GDA PA) mejlisini geçirer. Güýzki diplomatik möwsümiň çäklerinde geçiriljek çäreleriň taýýarlyk işleri Türkmenistanyň Daşary işler ministrliginde GDA PA-nyň Geňeşiniň Baş sekretary Dmitriý Kobiski we ýurduň degişli ministrlikleriniň hem-de edaralarynyň wekilleriniň gatnaşmagynda geçirilen iş duşuşygynda ara alnyp maslahatlaşyldy.
Türkmenistanda parlamentara forumyň geçirilmegi türkmen halkynyň Milli Lideri Gurbanguly Berdimuhamedowyň başlangyjynyň dowamy bolar. Bu başlangyç Mejlisiniň Başlygy Dünýägözel Gulmanowa tarapyndan Assambleýanyň maý aýynda geçirilen plenar mejlisinde beýan edildi.
Güýzki Assambleýanyň esasy çäreleri 2026-njy ýylyň 19–20-nji noýabrynda geçirilmek meýilleşdirilýär. Şol günlerde GDA PA-nyň Geňeşiniň mejlisi, Assambleýanyň 61-nji plenar mejlisi, şeýle hem guramanyň hemişelik ugurdaş komissiýalarynyň birnäçe duşuşygy geçiriler.
Mundan başga-da, Arkalaşygyň parlament çäreleriniň senenamasyna ýene-de bir iri forum goşular. 2026-njy ýylyň 7-nji oktýabrynda Türkmenistanyň Mejlisi GDA PA-nyň we BSGG-niň Ýewropa býurosy bilen bilelikde «Saglygy goraýyş hyzmatlarynyň ählumumy elýeterliligi we durnukly ösüş maksatlary» atly II Halkara maslahatyny geçirer. Oňa GDA ýurtlarynyň parlament agzalary, sebit ýurtlarynyň saglygy goraýyş ministrlikleriniň ýolbaşçylary, BSGG-niň bilermenleri we GDA-nyň Ýerine ýetiriji komitetiniň wekilleri gatnaşarlar.
Oktýabr aýynda geçiriljek lukmançylyk forumynyň esasy temalary ilatyň ilkinji lukmançylyk-sanitariýa kömegini ösdürmek, derman serişdeleriniň howpsuzlygyny üpjün etmek, şeýle hem ilatyň saglygyny goramaga gönükdirilen salgyt syýasatyny kemala getirmekde kanun çykaryjylaryň orny bolar.
