Türkmenistanyň serhet geçelgelerinde sanitariýa-epidemiologiýa gözegçiliginiň halkara standartlary ornaşdyrylýar
Aşgabatda Türkmenistanyň Saglygy goraýyş we derman senagaty ministrligiň hem-de Türkmenistanyň Döwlet serhet gullugynyň hünärmenleri üçin Migrasiýa boýunça halkara guramasy bilen Bütindünýä saglygy goraýyş guramasynyň (BSGG) bilelikde guramagynda ýöriteleşdirilen okuw geçirildi. Okuwyň esasy maksady ýurduň gury ýer we howa serhetlerinde ilatyň saglygyna abanýan howplara dessin jogap bermek mehanizmlerini işläp taýýarlamakdan ybarat boldy.
Migrasiýa boýunça halkara guramasynyň Wenadaky Sebitleýin edarasynyň we BSGG-niň wekilhanasynyň bilermenleri türkmen hünärmenlerine migrasiýa akymlaryny yzarlamagyň sanly algoritmlerini, şeýle hem howply ýokanç keselleri göni serhet geçelgelerinde ir ýüze çykarmak ulgamlaryny hödürlediler.
Amaly okuwlaryň dowamynda gatnaşyjylar adatdan daşary ýagdaýlar we tebigy betbagtçylyklar ýüze çykan halatynda serhet geçelgelerinde ulanylmagy üçin standart amaly amallary işläp taýýarladylar. Täze düzgünnama lukmançylyk gulluklarynyň ilkinji anyklaýyşdan we karantin çärelerinden başlap, edaralaryň arasynda maglumat alyş-çalyşyna hem-de gyssagly lukmançylyk we psihologik kömek bermäge çenli ýerine ýetirmeli hereketleriniň algoritmini kesgitleýär.
Serhetlerdäki epidemiologik gözegçiligiň milli saglygy goraýyş ulgamy bilen integrasiýasyna aýratyn üns berildi. Bu taslama Migrasiýa boýunça halkara guramasynyň Merkezi Aziýada we Owganystanda adatdan daşary ýagdaýlara taýýarlygy ýokarlandyrmak maksatnamasynyň çäklerinde durmuşa geçirilýär.
