Reýndäki suwuň derejesiniň peselmegi Germaniýanyň ykdysadyýetine uly ýitgileriň howpuny döredýär
Derýa — bu diňe bir suw akymy bolman, eýsem senagaty we söwdany üpjün edýän ýaşaýyş ähmiýetli damardyr. Onuň suwy azalanda, tutuş ykdysadyýet zyýan çekýär, netijeleri bolsa kenarýaka sebitleriniň çäginden has uzaklara ýaýraýar.
Reýndäki suwuň derejesiniň yzygiderli pes bolmagy ýük daşamalaryny düýpli çäklendirdi diýip, Reýnland-Pfaltsyň Söwda-senagat palatasynyň metbugat sekretary Nikol Rabolt ýekşenbe güni habar berdi. Rabolt häzirki wagtda ýetirilen zyýanyň 2018-nji ýyldaky görkezijilerden geçjek-geçmejekdiginiň entek belli däldigini belledi. Şol ýyl suwuň derejesiniň peselmegi takmynan 2,4 milliard ýewro möçberinde ýitgilere getiripdi.
Germaniýanyň içerki ýük daşamalarynyň takmynan 80 göterimi Reýn derýasynyň üsti bilen amala aşyrylýar. Şol sebäpli ol ýurduň senagat logistikasynyň iň möhüm damarlarynyň biri hasaplanýar. Şu ýyl Germaniýada yzygiderli yssy we gurak döwürler bolup geçdi. Munuň netijesinde derýadaky suwuň derejesi uzak wagtlap pes bolmagynda galdy we ýük daşamalaryna düýpli päsgelçilik döredi. Käbir gämiler ýalpaklykda galýan bolsa, beýlekileri ýüküni azaldyp ýa-da boş ýagdaýda gatnamaly bolýarlar.
“CCTV+”-niň habar berşi ýaly, Reýndäki ýagdaý dartgynly bolmagynda galýar we bilermenler suwuň derejesiniň mundan beýläk hem peselmeginiň Germaniýanyň ykdysadyýeti üçin has uly ýitgilere getirip biljekdigini duýdurýarlar.
