Türkmenistanyň müftüsi Baku şäherinde türki döwletleriň din ýolbaşçylarynyň duşuşygynda çykyş etdi
Şu gün Baku şäherinde Türki döwletleriň guramasyna (TDG) agza döwletleriň musulman dini dolandyryş edaralarynyň ýolbaşçylary Geňeşiniň 7-nji mejlisi geçirildi. Foruma Türkmenistanyň täze saýlanan Musulmanlaryň Dini müdirliginiň başlygy, müfti Rahman Gurbanmyradowyň ýolbaşçylygyndaky wekiliýet gatnaşdy.
Duşuşygyň esasy maksady türki halklaryň dini ýolbaşçylarynyň arasyndaky hyzmatdaşlygy pugtalandyrmakdan, jemgyýetçilik durmuşynyň möhüm meseleleri boýunça pikir alyşmakdan we bilelikdäki tagallalary utgaşdyrmakdan ybarat boldy.
Türkmenistanyň müftüsi öz çykyşynda köp asyrlyk doganlyk däpleriniň, dil, medeniýet we ruhy gymmatlyklaryň ýakynlygynyň sebit döwletleriniň arasynda dialogy ösdürmek üçin berk binýady emele getirýändigini nygtady.
Türkmenistanyň Musulmanlarynyň Dini müdirliginiň başlygynyň pikirine görä, dini ýolbaşçylaryň göni dialogy umumy meseleleriň netijeli çözgütlerini tapmaga ýardam edýär hem-de türki halklaryň mundan beýläk-de ýakynlaşmagyna goşant goşýar.
ORIENT
