Türkmenistanyň DIM-de ÝB-niň we Fransiýanyň täze ilçileri, şeýle hem Özbegistanyň diplomatik wekilhanasynyň ýolbaşçysy bilen duşuşyklar geçirildi
9-njy sentýabrda Türkmenistanyň Daşary işler ministrliginde daşary ýurtlaryň diplomatik wekilhanalarynyň ýolbaşçylary bilen ikitaraplaýyn gepleşikler geçirildi. Duşuşyklarda diplomatik wekilhanalaryň täze ýolbaşçylarynyň işe başlamagy we hyzmatdaşlygyň häzirki gün tertibi boýunça pikir alyşmalar geçirildi.
Türkmenistanyň daşary işler ministri Raşid Meredow Ýewropa Bileleşiginiň Türkmenistandaky täze bellenen ilçisi Lýuk Pýer Dewin we Fransiýa Respublikasynyň täze bellenen Adatdan daşary we Doly ygtyýarly ilçisi Alena Grand bilen duşuşyklary geçirdi.
Türkmenistanyň daşary syýasat edarasynyň ýolbaşçysy diplomatlary Aşgabatdaky işlerine başlamagy bilen gutlap, ýurduň hem «Merkezi Aziýa — ÝB» formatynda, hem-de ikitaraplaýyn derejede syýasy-diplomatik, söwda-ykdysady we medeni ugurlarda amaly hyzmatdaşlygy giňeltmäge gyzyklanma bildirýändigini nygtady.
Şol gün Türkmenistanyň DIM-inde daşary işler ministriniň orunbasary Mähri Bäşimowa bilen Özbegistan Respublikasynyň ilçisi Rawşanbek Alimowyň arasynda iş duşuşygy geçirildi. Diplomatlar iki goňşy we dostlukly döwletiň strategik hyzmatdaşlygynyň yzygiderli ösdürilmegini ara alyp maslahatlaşdylar. Hususan-da, halkara meýdançalarynda, ilkinji nobatda bolsa Birleşen Milletler Guramasynda tagallalary utgaşdyrmak meselesine, şeýle hem döwletara dialogy çuňlaşdyrmaga gönükdirilen öňde boljak bilelikdäki çäreleriň taýýarlygy bilen bagly amaly meselelere aýratyn üns berildi.
