OPEK 2026-njy ýylda dünýäde nebite bolan islegiň ösüşi baradaky çaklamasyny ýene-de peseltdi
Nebit dünýä ykdysadyýetiniň gany bolmagynda galýar, çaklamalar bolsa onuň barometri bolup durýar. Çaklamalaryň aýdan-aýa aşaklygyna täzeden seredilmegi diňe bir sanlar bilen bagly däl, eýsem ählumumy islegde bolup geçýän düýpli üýtgeşmeleriň we barha artýan näbelliligiň alamatydyr.
Bu eýýäm OPEK-iň 2026-njy ýylda nebite bolan islegiň ösüşi baradaky çaklamasyny yzly-yzyna bäşinji aý peseldýän döwrüdir. Şeýlelikde, çaklama maý aýynda bir günde 1,17 million barrele, iýun aýynda 970 müň barrele, iýul aýynda 780 müň barrele, awgust aýynda bolsa 580 müň barrele çenli peseldildi. Bu maglumatlar OPEK-iň nebit bazarynyň ýagdaýy baradaky soňky aýlyk hasabatynda çap edildi. Hasabatda ykdysady ösüşiň ugurlary we geosyýasy dartgynlylygyň ykdysady täsiri, inflýasiýa basyşynyň gaýtadan güýçlenmegi, şeýle hem ABŞ-nyň söwda nyrhnamalary babatda alyp barýan syýasaty bilen bagly dowam edýän näbellilik ýaly häzirki meseleler göz öňünde tutulýar.
2026-njy ýyl üçin çaklamalaryň peseldilmegine garamazdan, hasabatda 2027-nji ýyl üçin çaklamalara ýokarlandyryş tarapyna täzeden seredilmegi dowam etdirilýär. Oňa laýyklykda, 2027-nji ýylda dünýäde nebite bolan islegiň ýyllyk hasapda awgust aýyndaky 2,2 million barrele bolan çaklama bilen deňeşdirilende, takmynan 2,4 million barrel/gün artmagyna garaşylýar. Penşenbe güni çap edilen hasabata görä, çaklamanyň ýokarlandyrylmagy Ykdysady Hyzmatdaşlyk we Ösüş Guramasyna (OECD) girýän ýurtlarda-da, oňa girmeýän ýurtlarda-da nebite bolan islegiň artmagyna garaşylýandygy bilen şertlendirilýär.
CCTV+-yň habar bermegine görä, OPEK-iň 2026-njy ýyl üçin çaklamasynyň peseldilmegi bazara gatnaşyjylaryň dünýä ykdysadyýetiniň durnuksyzlygy we geosyýasy faktorlaryň täsiri baradaky aladalarynyň artýandygyny görkezýär. Şol bir wagtyň özünde, 2027-nji ýyl üçin çaklamanyň ýokarlandyrylmagy nebite bolan uzak möhletleýin isleg babatda, aýratyn-da ösüp barýan ýurtlarda, optimizmiň saklanyp galýandygyny görkezýär.
