Awazada Aral deňzi üçin BMG-niň Ýörite maksatnamasyny döretmek boýunça sebit duşuşygy geçirilýär
«Awaza» milli syýahatçylyk zolagynda Aral deňziniň basseýni üçin BMG-niň Ýörite maksatnamasyny (UN SPAS) durmuşa geçirmegiň mehanizmlerini işläp taýýarlamaga bagyşlanan Merkezi Aziýa ýurtlarynyň ikinji konsultatiw duşuşygy geçirilýär.
Iki günlük forum sebitiň ýurtlarynyň degişli edaralarynyň ýolbaşçylaryny, ekologiýa we suw serişdeleri boýunça bilermenleri, şeýle hem halkara maliýe institutlarynyň wekillerini bir ýere jemledi. Gatnaşyjylaryň üns merkezinde sebitde suw howpsuzlygynyň umumy ileri tutulýan ugurlaryny ylalaşmak, Aralyň ekoulgamlaryny dikeltmek we serhetüsti suw akymlaryny netijeli dolandyrmak meseleleri durýar.
«Aral deňziniň basseýni — howanyň üýtgemegi, ekoulgamlaryň ýagdaýy we ykdysady ösüşiň biri-biri bilen aýrylmaz baglanyşykly bolan sebitidir. BMGÖM üçin suw diplomatiýasy durnukly ösüş maksatlaryna ýetmek üçin bilimleri, innowasiýalary we hyzmatdaşlygy birleşdirmegiň guralydyr», — diýip, BMGÖM-niň Türkmenistandaky Hemişelik wekili Narine Saakýan nygtady.
Maslahatlaşmalaryň netijeleri boýunça wekiliýetler geljekki BMG-niň Ýörite maksatnamasyny durmuşa geçirmek üçin utgaşdyryş we maliýe mehanizmlerini kesgitleýän ýeke-täk resminamany işläp taýýarlamagy meýilleşdirýärler.
Çäre Türkmenistanyň Daşary işler ministrliginiň, Türkmenistanyň Suw hojalygy baradaky döwlet komitetiniň we Daşky gurşawy goramak ministrliginiň gatnaşmagynda, BMGÖM-niň we Global ekologiýa gaznasynyň (GEF) bilelikdäki taslamasynyň çäklerinde, şeýle hem Blue Peace Central Asia şweýsariýa başlangyjynyň goldawy bilen guraldy.
