Serdar Berdimuhamedow Ýewropa Bileleşiginiň täze ilçisi Luk Dewinden ynanç hatyny kabul etdi
9-njy sentýabrda Prezident Serdar Berdimuhamedow Ýewropa Bileleşiginiň Türkmenistanda täze bellenilen Adatdan daşary we Doly ygtyýarly ilçisi Lýuk Pýer Dewini kabul etdi. Ilçi döwlet Baştutanyna ynanç hatyny gowşurdy. Doly ygtyýarly wekil Ýewropa Geňeşiniň Başlygy Antonio Koştanyň we Ýewropa Komissiýasynyň Başlygy Ursula fon der Lýaýeniň Prezident Serdar Berdimuhamedowa we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa iberen mähirli salamyny ýetirdi.
Duşuşygyň dowamynda taraplar Merkezi Aziýa bilen Ýewropa Bileleşiginiň arasyndaky gatnaşyklaryň ähmiýetini we «Ýewropa Bileleşigi – Merkezi Aziýa» birinji sammitiniň netijeleri esasynda ösdürilýän hyzmatdaşlygyň depginli häsiýete eýedigini bellediler. Bu sammit sebitiň Ýewropa bileleşigi bilen gatnaşyklaryny strategik hyzmatdaşlyk derejesine çykardy.
Energetika, gaýtadan dikeldilýän energiýa çeşmeleri, sanlylaşdyrma, daşky gurşawy goramak, şeýle hem Ýewropa bazarlaryna çykmak üçin Hazarüsti ulag geçelgesiniň mümkinçiliklerinden peýdalanmak amaly hyzmatdaşlygyň ileri tutulýan ugurlary hökmünde kesgitlenildi.
Duşuşygyň netijelerini teswirlemek bilen, Ýewropanyň Daşary aragatnaşyklar gullugynda we Söwda boýunça Baş direktorlykda köp ýyllyk iş tejribesi bolan ilçi Dewin halkara hukugynyň kadalary esasynda ählumumy gapma-garşylyklary parahatçylykly ýollar bilen çözmek meselelerinde bitarap Türkmenistanyň we Ýewropa Bileleşiginiň garaýyşlarynyň ýokary derejede gabat gelýändigini nygtady. Şeýle hem ol Aşgabatdaky ÝB-niň wekilhanasynyň umumy bähbitleri anyk ykdysady we maýa goýum taslamalaryna öwürmäge gönükdirilendigini tassyklady.
