Braziliýa paýtagtda Garaşsyzlyk gününi giň gerimli dabaraly ýöriş bilen belledi
Garaşsyzlyk güni – diňe bir senenamadaky sene däl, eýsem milli özygtyýarlylygyň we jebisligiň nyşanydyr. Her ýyl braziliýalylar ata-babalaryny hatyralamak we öz ýurduna bolan buýsanjyny görkezmek üçin Braziliýa şäherinde ýygnanýarlar. Dabaraly harby ýöriş ýurduň güýjüniň, taryhynyň we medeniýetiniň beýanyna öwrülýär.
Duşenbe güni Braziliýanyň paýtagtynda giň gerimli dabaraly harby ýöriş geçirip, Garaşsyzlygynyň 204 ýyllygyny belledi. Dabaralar 1822-nji ýylda Portugaliýadan garaşsyzlygyň yglan edilmeginiň şanly senesine bagyşlandy. Çärä Braziliýanyň Prezidenti Luis Inasiu Lula da Silwa, wise-prezident Žeraldu Alkmin we ýurduň beýleki ýokary derejeli döwlet işgärleri gatnaşdy.
Dabaraly harby ýöriş takmynan iki sagat dowam etdi. Onda Braziliýanyň gury ýer goşunynyň, deňiz güýçleriniň, howa güýçleriniň, şeýle hem polisiýanyň we ýangyn söndürijileriň çykyşlary görkezildi. Dabaryly ýöriş hatara düzülen harby bölümleri, sowutly ulaglaryň kerwenlerini, atly goşun bölümlerini we howa güýçleriniň täsirli çykyşyny öz içine aldy.
Şu ýylky dabaraly ýöriş milli özygtyýarlylyk, zenanlary we çagalary goramak, şeýle hem Braziliýanyň 2027-nji ýylda geçiriljek zenanlaryň arasynda futbol boýunça dünýä çempionatyna ýer eýesi bolmagy ýaly temalara bagyşlandy. Prezidentiň köşgüniň maglumatlaryna görä, dabaraly ýörişi takmynan 70 müň adam synlady.
“CCTV+”-niň habar berşi ýaly, Braziliýada Garaşsyzlyk gününiň baýramçylygy däp bolşy ýaly, raýatlary birleşdirýän we ýurduň harby kuwwatyny görkezýän möhüm çärä öwrülýär. Şu ýyl aýratyn üns jemgyýetçilik meselelerine berildi. Bu bolsa häkimiýetleriň milli jebisligi pugtalandyrmaga we raýatlaryň hukuklaryny goramaga çalyşýandygyny görkezýär.
