Özbegistanda "sanly sum" synagdan geçirilýär: "HUMO" steýblkoinyň synag taslamasy başlandy
Özbegistanda "Yuz.uz" neşiriniň habar bermegine görä, töleg serişdesi hökmünde "HUMO" durnukly tokenini synagdan geçirmek boýunça taslama başlandy.
Taslama Geljegi uly taslama milli agentligi tarapyndan ýurduň Merkezi banky bilen bilelikde ýörite hukuk tertibi — kadalaşdyryjy "gum gutusynyň" çäklerinde durmuşa geçirilýär.
"HUMO" steýblkoiny milli walýutanyň sanly ekwiwalenti bolup durýar: bir tokeniň bahasy bir suma berk baglanyşyklydyr. Taslamanyň esasy aýratynlygy sanly tokenleriň çykarylyşynyň Özbegistan Respublikasynyň döwlet gymmat kagyzlary bilen doly üpjün ediljekdigidir. Taslamanyň operatory hökmünde "HUMO Digital" kompaniýasy çykyş edýär, tehniki hyzmatdaşy bolsa "Asterium" paýdarlar jemgyýetiniň kripto-platformasy boldy.
12 aýlyk synag möhletiniň dowamynda hünärmenler tokeniň dolanyşygynyň doly tapgyryny — onuň çykarylyşyndan başlap, harytlar we hyzmatlar üçin gündelik tölegleriň amala aşyrylmagyna hem-de bank we blokçeýn ulgamlarynyň birleşdirilmegine çenli synagdan geçirerler. Kadalaşdyryjy edaralar kiberhowpsuzlyga, geleşikleriň aç-açanlygyna we sarp edijileriň hukuklarynyň goralmagyna aýratyn üns bererler.
"Sanly sumuň" işe girizilmegi Özbegistanyň maliýe pudagynda blokçeýn tehnologiýalarynyň netijeli ulanylyşyna baha bermäge we sebitde häzirki zaman sanly töleglerini ösdürmek üçin howpsuz infrastrukturany döretmäge mümkinçilik berer.
ORIENT
