Türkmenistan Lissabonda geçirilen «Bitewi saglyk» Bütindünýä kongresinde milli tejribesini hödürledi
Türkmenistan 4–7-nji sentýabr aralygynda Portugaliýanyň paýtagty Lissabon şäherinde geçirilýän «Bitewti saglyk» atly 9-njy Bütindünýä kongresine gatnaşýar. Dünýäniň dürli ýurtlaryndan bilermenleri, alymlary we döwlet edaralarynyň wekillerini bir ýere jemlän iri halkara forumyň çäginde Türkmenistanyň Oba hojalyk ministrliginiň Döwlet weterinariýa gullugynyň Halkara we ylmy aragatnaşyklar bölüminiň müdiri, «Bitewi saglyk» çemeleşmesini durmuşa geçirmek boýunça Milli utgaşdyryjysy Arslan Soltanmyradow ýöriteleşdirilen sessiýada çykyş edip, biologik we ekologik howpsuzlyk ulgamynda pudagara hyzmatdaşlygy ösdürmek boýunça Türkmenistanyň tejribesini hödürledi.
Lissabonda ara alnyp maslahatlaşylýan «Bitewi saglyk» (One Health) çemeleşmesi häzirki zaman ylmy düşünjäni şöhlelendirýär. Oňa laýyklykda, adamyň abadançylygyna haýwanat dünýäsiniň we daşky gurşawyň ýagdaýyndan üzňe garamak mümkin däldir. Iş ýüzünde bu umumy howplaryň öňüni almak üçin lukmanlaryň, weterinar hünärmenleriniň, ekologlaryň we agronomlaryň tagallalaryny birleşdirmegi aňladýar. Şeýle bitewi gözegçilik ulgamynyň döredilmegi howply ýokanç keselleri we zoonoz keselleri haýwanlarda ýüze çykan ilkinji döwründe anyklamaga, azyk önümçiligi zynjyrlarynyň üsti bilen antibiotiklere durnuklylygyň ýaýramagynyň öňüni almaga hem-de klimatyň üýtgemegi bilen bagly töwekgelçilikleri azaltmaga mümkinçilik berýär.
Türkmenistan üçin şeýle ýokary derejeli foruma gatnaşmak epidemiologik we weterinariýa gözegçiliginiň milli mehanizmlerini dünýäniň saglygy goraýyş ulgamyna birleşdirmek boýunça nobatdaky amaly ädim bolup durýar. Pudagara hyzmatdaşlygyň ösdürilmegi we biologik howpsuzlygyň halkara standartlarynyň ornaşdyrylmagy diňe bir ilatyň saglygyny ygtybarly goramaga we ekoulgamlaryň bitewüligini saklamaga däl, eýsem oba hojalyk pudagynyň durnuklylygyny pugtalandyrmaga hem mümkinçilik berýär. Bu bolsa ýurduň uzak möhletleýin ykdysady we ekologik abadançylygyna ýardam edýär.
