Çendu şäherinden Türkmenistana ikinji göni demir ýol gatnawy ýola goýuldy
Hytaý bilen Merkezi Aziýanyň arasyndaky halkara ulag ulgamynda göni ýük daşamalaryň geografik çäkleri giňeldilýär. Syçuan welaýatynyň dolandyryş merkezi bolan Çendu şäherinden Türkmenistanyň serhetýaka Sarahs bekedine tarap täze demir ýol ugry boýunça ilkinji ýük otlusy ýola düşdi. Bu gatnaw Hytaýyň günorta-günbatar bölegindäki iri ykdysady merkez bilen Türkmenistany birleşdirýän ikinji göni gury ýer ýük daşama ugruna öwrüldi.
Bu ugruň ösdürilmegi sebitiň logistika infrastrukturasynyň yzygiderli özgerýändigini görkezýär. 2014-nji ýylda Hytaý – Merkezi Aziýa ýük otlulary maksatnamasy işe girizileli bäri ugurlar ulgamy Çendu, Almaty we Daşkent arasyndaky ýerli gatnawlardan başlap, Astana, Bişkek, Duşanbe we Sarahs ýaly möhüm çatryk beketlerini öz içine alýan derejä çenli giňeldi. Türkmenistana goşmaça demir ýol ugrunyň açylmagy Sarahs bekediniň Merkezi we Günorta Aziýanyň çatrygynda ýerleşýän möhüm üstaşyr derwezeleriň biri hökmündäki ornuny has-da berkitmek bilen, söwda akymlarynyň üznüksiz arabaglanyşygyny üpjün edýär.
«Sinhua» agentliginiň bellemegine görä, Hytaýyň iň iri senagat seýilgähleriniň biri bilen Türkmenistanyň arasynda işe girizilen ikinji logistika hyzmaty sebitleriň arasyndaky gury ýer söwdasynyň ulgamlaýyn we senagat derejesine çykandygyny görkezýär.
