Eýran Trampyň Harg adasy baradaky emeli aň arkaly taýýarlanan wideosyna jogap berdi we agressiýadan ägä bolmaga çagyrdy
Duşenbe güni Eýranyň Ýaragly Güýçleriniň Baş ştaby beýannama ýaýradyp, goňşy döwletleriň milli özygtyýarlylygyna hormat goýýandygyny, emma islendik agressiýa hereketine ýol bermejekdigini we şeýle hereketlere has uly güýç bilen jogap berjekdigini tassyklady. Eýranyň harbylarynyň beýannamasynda bellenilişine görä, Ýakyn Gündogaryň birnäçe döwletiniň ABŞ-nyň duşmançylykly güýçleriniň Eýrana garşy zarba urmak üçin öz çäklerinden peýdalanmagyna ýol bermeýändikleri baradaky resmi beýanatlaryna, şeýle hem Tähranyň öňki duýduryşlaryna garamazdan, amerikan goşunlary öz çäklerinden Eýranyň käbir harby desgalaryna zarbalar urupdyr.
Beýannamada amerikan goşunlarynyň sebitden goşunlaryny çykarmakdan başga ýolunyň ýokdugy nygtaldy. Şeýle hem ABŞ-nyň Eýrana garşy agressiýasyna ýardam berýän taraplaryň Eýranyň Ýaragly Güýçleriniň ähli goşun görnüşleriniň agressiýanyň islendik çeşmesine garşy göreşmekde we ony ýok etmekde bitewi hereket etjekdigine düşünmelidikleri bellenildi.
Şol bir wagtyň özünde, Eýranyň Milli Nebit Kompaniýasynyň (NIOC) wekili şol gün ABŞ-nyň Prezidenti Donald Trampyň Harg adasynyň weýran edilendigi baradaky tassyklamasynyň «manysynyň ýokdugyny» aýdyp, adadaky nebit çykaryş işleriniň hiç haçan togtadylmandygyny mälim etdi.
Mundan ozal Tramp öz sosial ulgamlarynda emeli aňyň kömegi bilen taýýarlanan, Tähranyň esasy nebit merkezleriniň biri bolan Harg adasyndaky nebit desgalaryny partlamalaryň weýran edýändigini görkezýän wideo ýerleşdiripdi. «Harg adasy bölek-bölek bolup uçýar!!!» diýip, Tramp özüniň Truth Social platformasynda ýazdy.
CCTV+ agentliginiň habar bermegine görä, Eýranyň Baş ştabynyň beýannamasy we Trampyň haýbatlaryna berlen jogap Tähranyň basyşa boýun egmek niýetiniň ýokdugyny we aýgytly çäreleri görmäge taýýardygyny görkezýär. Çaknyşyk harby we ykdysady gurallar bilen berkidilýän ritorika täze tapgyra girýär. Ýagdaý örän dartgynly bolmagynda galýar we islendik seresapsyz hereket sebitde giň gerimli dartgynlylyga getirip biler. Bu bolsa betbagtçylygyň öňüni almak üçin halkara jemgyýetçiliginiň goşulmagyny talap eder.
