Eýran söwda akymlarynyň bir bölegini Hazar deňzine geçirmek mümkinçiligini öwrenýär
Ormuz bogazyndaky çylşyrymly ýagdaýyň şertlerinde Eýranyň häkimiýetleri ýurduň demirgazygynyň we Hazar deňziniň üsti bilen ýük daşamalaryny ösdürmek mümkinçiligine seredýärler diýip, “Fars” agentligi habar berýär.
Bilermenler topary tarapyndan “Hazar ekspressi” diýlip atlandyrylan bu başlangyç logistika çykdajylaryny mümkin boldugyça azaltmagy we harytlary Merkezi Aziýa ýurtlaryna hem-de Ýewraziýa sebitine ýetirmek üçin durnukly alternatiw ugur döretmegi maksat edinýär.
Taslama Enzeli, Amirabad we Nowşehr portlarynyň infrastrukturasyny işjeň peýdalanmagy göz öňünde tutýar. Bu portlardan ýükler Hazar deňziniň üsti bilen hyzmatdaş ýurtlaryň portlaryna daşalar. Eýran eksportynyň «demirgazyk ugrunyň» giňeldilmegi «Demirgazyk — Günorta» we «Gündogar — Günbatar» geçelgeleriniň çatrygynda möhüm logistika merkezi bolup çykyş edýän Türkmenbaşy Halkara deňiz porty üçin täze mümkinçilikleri açýar.
