Gurbanguly Berdimuhamedow Arkadag şäheriniň gurluşygynyň ikinji tapgyrynyň taslamalary bilen tanyşdy
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow 29-njy awgustda Arkadag şäherine iş saparyny amala aşyryp, bu ýerde şäheriň gurluşygynyň ikinji tapgyrynyň çäklerinde alnyp barylýan işler, döwrebaplaşdyrylýan Halkara ahalteke atçylyk sport toplumyndaky işleriň barşy bilen tanyşdy.
Türkmen halkynyň Milli Lideri saparyň dowamynda ilki bilen 30 müň adama niýetlenen metjidiniň çäklerinde gurulýan muzeýiň muzeý bilen tanyşdy. Binada emeli aň tehnologiýalary we 3D animasiýa bilen üpjün edilen sanly tanyşdyryş ulgamy ornaşdyrylypdyr. Interaktiw monitorlarda türkmen, rus we iňlis dillerinde ahalteke bedewleriniň taryhy, milli halyçylyk sungaty hem-de ýurdumyzyň tebigaty baradaky maglumatlar bilen tanşyp bolýar.
Halk Maslahatynyň Başlygyna çagalar bagynyň hem-de daşary ýurt dillerine ýöriteleşdirilen orta mekdebiň şekil taslamalary we çyzgylary görkezildi.
Soňra Gurbanguly Berdimuhamedow Halkara ahalteke atçylyk sport toplumyna baryp, onuň giň gerimli döwrebaplaşdyryş meýilnamasy bilen tanyşdy. Durkuny täzelemegiň çäklerinde atçylyk ýodasy, dolandyryş binalary, muzeý hem-de Aba Annaýewiň adyndaky atşynaslar şäherçesiniň infrastrukturasynyň täzelenmegi göz öňünde tutulýar. Atçylyk sport toplumynynyň seýilgäh zolagy gijeki yşyklandyryş ulgamy bilen üpjün ediler.
Soňra Gurbanguly Berdimuhamedow toplumyň atly sport oýunlary binasynyň ýapyk manežine baryp, adaty endigine görä, özi seýislän Hanbeg atly bedewi bilen didarlaşdy hem-de ynsan gylykly bedewinde birsellem gezim etdi.
Saparyň ahyrynda Gurbanguly Berdimuhamedow Arkadag şäheriniň Ahalteke atlary şaýolunyň «Taýçanak» binasyndan «Polatly» binasyna çenli aralykdaky ýoluň gurluşygyna degişli çyzgylar, şekiller bilen tanyşdy. Türkmen halkynyň Milli Lideri awtomobil ýollarynda amatly şertleriň üpjün edilmegi, ýollaryň ugrunda döredilýän seýilgäh zolagynyň abadanlaşdyrylmagy, şeýle hem ýoluň gyralarynda atlaryň heýkelleriniň oturdylmagy boýunça degişli görkezmeleri berdi.
