Türkmenistanda sanly işewürligi goldamak üçin elektron söwda barada kanun işlenip taýýarlanylýar
Türkmenistanyň Mejlisinde «Elektron söwda hakynda» täze kanun işlenip taýýarlanylýar. Sanly söwda, marketpleýsler we onlaýn hyzmatlar ýaly çalt ösýän pudagy düzgünleşdirmäge gönükdirilen bu kadalaşdyryjy hukuk namasynyň taýýarlanylmagy Prezident Serdar Berdimuhamedowyň başlyklyk etmeginde anna güni geçirilen Ministrler Kabinetiniň mejlisinde ara alnyp maslahatlaşyldy.
Täze resminama elektron söwda bazaryna gatnaşyjylar üçin aýdyň hukuk binýadyny döretmäge, sanly gurşawda sarp edijileriň hukuklarynyň gorag derejesini ýokarlandyrmaga we onlaýn görnüşde iş alyp barmak üçin amatly şertleri döretmäge gönükdirilendir.
Şol bir wagtyň özünde milli parlament Türkmenistanyň Jenaýat, Gümrük, Zähmet, Sanitariýa we Maşgala kodekslerine hem-de başga-da käbir kanunçylyk namalaryna üýtgetmeleri we goşmaçalary girizmek boýunça işleri alyp barýar. Şeýle hem ýurduň halkara hukuk resminamalaryna goşulmagyny çaltlandyrmak maksady bilen kanunçylygy kämilleşdirmek boýunça işler dowam etdirilýär.
“Elektron söwda hakynda” resminamanyň işlenip taýýarlanylmagy ýurduň häzirki zaman sanly ekoulgamyny kemala getirmek ýolunda nobatdaky yzygiderli ädim bolar. Mundan ozal, 2025-nji ýylyň noýabr aýynda Türkmenistanda «Wirtual aktiwler hakynda» kanun kabul edildi. Bu kanun sanly dolanyşygynyň we maýningiň hukuk esaslaryny kesgitledi. Ol geljekde elektron söwda baradaky kanun bilen bilelikde “fintech” pudagyny ösdürmek üçin doly hukuk şertleriniň döredilmegine mümkinçilik berýär.
