Duşenbede Türkmenistan bilen Täjigistanyň arasynda bilermenler-seljerjiler dialogynyň ugurlary kesgitlenildi
Täjigistanyň we Türkmenistanyň seljeriş merkezleri hem-de ylmy-barlag edaralary bilelikdäki işleri işjeňleşdirmegi maksat edinýärler. Ikitaraplaýyn hyzmatdaşlygyň ileri tutulýan ugurlary hökmünde bilelikdäki barlaglary geçirmek, seljeriş materiallaryny taýýarlamak, şeýle hem sebit howpsuzlygy, ykdysadyýet we halkara gatnaşyklary ulgamyndaky hünärmenleriň arasynda yzygiderli dialogy ýola goýmak kesgitlenildi.
Iki ýurduň arasyndaky bilermenlik hyzmatdaşlygynyň esasy ugurlary we geljegi Täjigistan Respublikasynyň Prezidentiniň ýanyndaky Strategiki barlaglar boýunça merkeziniň direktory Haýridin Usmonzoda bilen Türkmenistanyň Täjigistandaky Adatdan daşary we Doly ygtyýarly Ilçisi Aýmyrat Goçmyradowyň arasynda geçirilen duşuşykda ara alnyp maslahatlaşyldy.
Taraplar ynsanperwer we bilermenler derejesindäki hyzmatdaşlyga ikitaraplaýyn gatnaşyklaryň möhüm ugurlarynyň biri hökmünde baha berdiler. Iki ýurduň seljerijileriniň üns merkezinde bilimleri we häzirki zaman ylmy-barlaglaryň netijelerini alyşmak üçin hemişelik meýdançalary döretmek, şeýle hem bilelikdäki ylmy barlaglaryň tapgyryny geçirmek, seljeriş hasabatlaryny taýýarlamak, şeýle hem halkara maslahatlaryny, «tegelek stol» duşuşyklaryny we tematik seminarlary geçirmek meselesi boldy.
Taraplar sebitiň ösüş proseslerini, ykdysadyýet, halkara syýasaty we howpsuzlyk meselelerini öwrenýän hünärmenleriň arasynda yzygiderli gatnaşyklary ýola goýmagyň zerurdygyny nygtadylar.
Bilermenleriň garaýyşlaryny yzygiderli alyşmagyň Merkezi Aziýada we halkara giňişliginde bolup geçýän özgertmeleri hem-de meýilleri has çuňňur seljermäge mümkinçilik berjekdigi bellenildi. Hyzmatdaşlygyň uly mümkinçiliklerine eýe bolan Täjigistan bilen Türkmenistan ikitaraplaýyn görnüşde, şeýle hem sebitleýin gurluşlarynyň çäklerinde döwletara gatnaşyklary mundan beýläk-de ösdürmegi we çuňlaşdyrmagy maksat edinýärler.
