Türkmen küştçisi Allaýar Şirliýew BAE-de geçirilen halkara festiwalda ýeňiş gazandy
Türkmen küştçisi Allaýar Şirliýew 15–24-nji awgust aralygynda Abu-Dabide geçirilen 32-nji Halkara küşt festiwalynda “Open A” kategoriýasynda ajaýyp ýeňiş gazandy. Aşgabat şäherinden bolan 22 ýaşly ussatlyga dalaşgär nusgawy wagt gözegçiligi bilen geçirilen ýaryşda mümkin bolan 9 utukdan 8 utuk toplap, arassa birinji orny eýeledi.
FIDE-niň reýtinginde 2184 utugy bolan Allaýar Şirliýew ýaryşa diňe ýedinji belgili türgen hökmünde başlasa-da, ýaryşyň esasy dalaşgärlerden öňe geçmegi başardy. Jemleýji sanawda ol has ýokary derejeli garşydaşlaryny, şol sanda Siriýadan we Filippinlerden bolan halkara ussatlar Başir Eýti bilen Riçiliu III Salçedony hem yzda galdyrdy. Bu netije türkmen küştçüsiniň halkara reýtingine birbada 40,6 utuk goşmagyna mümkinçilik berdi.
Birleşen Arap Emirliklerinde Abu-Dabi küşt kluby tarapyndan guralan bu ýaryş däp bolşy ýaly, dünýäniň dürli ýurtlaryndan güýçli küştçüleri bir ýere jemledi. Şol günlerde geçirilen “Masters” ýaryşynda bolsa dünýä küşt elitasynyň wekilleri — halkara grossmeýsterler Daniil Dubow, Dawid Parawýan, Pa Iniýan we beýleki meşhur küştçüler çykyş etdiler. Şeýle ýokary derejeli bäsdeşlik şertlerinde Allaýar Şirliýewiň üstünlikli çykyş etmegi türkmen sportunda ýene bir möhüm waka boldy.
Abu-Dabidäki ýeňiş Türkmenistanyň küşt mekdebiniň 2026-njy ýylyň awgust aýyndaky üstünlikleriniň dowamydyr. Mundan öň Mumbaýda geçirilen ýetginjekleriň arasynda Aziýa çempionatynda Läle Şöhradowa rapid görnüşinde altyn, blitsde bolsa kümüş medal gazandy. Ondan biraz öň Türkmenistanyň ýygyndy topary Gyrgyzystanda geçirilen Merkezi we Demirgazyk Aziýanyň çempionatynda rekord derejede 16 medal gazanypdy.
