Türkmenistanyň Minsk şäherindäki ilçihanasynda Polosk döwlet uniwersitetiniň talyplary bilen duşuşyk geçirildi
20-nji awgustda Türkmenistanyň Minsk şäherindäki ilçihanasynda Ýefrosiniýa Poloskaýa adyndaky Polosk döwlet uniwersitetiniň türkmen we daşary ýurtly talyplaryny bir ýere jemlän maslahat geçirildi. Çäre ýurdumuzyň Garaşsyzlygynyň 35 ýyllygyna bagyşlanan baýramçylyk maksatnamasynyň çäklerinde we ýylyň «Garaşsyz, baky Bitarap Türkmenistan — bedew batly at-myradyň mekany» diýen şygarynyň şanyna guraldy.
Duşuşykda Türkmenistanyň Belarus Respublikasyndaky Adatdan daşary we Doly ygtyýarly ilçisi Nazarguly Şagulyýew ýaşlara gutlag sözi bilen ýüzlendi. Diplomat 35 ýylyň dowamynda ýurdumyzyň özygtyýarlylygynyň pugtalandyrylmagynyň we sebit diplomatiýasynyň ösdürilmeginiň esasy tapgyrlary barada belläp geçdi. Şeýle hem ol Türkmenistanyň Prezidenti Serdar Berdimuhamedowyň halkara bilim hyzmatdaşlygyny giňeltmek boýunça alyp barýan işlerine aýratyn üns çekdi.
Ilçi gatnaşyjylara ýetip gelýän Halk Maslahatynyň mejlisi barada hem ýatlatdy. Mejlisiň 23-nji sentýabrda Aşgabat şäherinde türkmen halkynyň Milli Lideri Gurbanguly Berdimuhamedowyň başlyklygynda geçirilip, ýurdumyzyň durmuş-ykdysady syýasatynyň esasy ugurlaryny kesgitlemäge gönükdiriljekdigi bellenildi.
Duşuşygyň medeni bölüminde talyplar ilçihananyň eýwanynda ýerleşdirilen, ýurdumyzyň gadymy binagärligini we häzirki zaman şäherleriniň keşbini görkezýän muzeý gymmatlyklarynyň hem-de fotosuratlaryň sergisi bilen tanyşdylar. Çäräniň maksatnamasy häzirki zaman Türkmenistanyň tehnologik we infrastruktura ugurlaryndaky gazananlary barada wideo filmiň görkezilişi bilen tamamlandy.
