Merkezi Aziýa ýurtlary elektron hökümet ulgamynda Günorta Koreýanyň tejribesini öwrenýärler
Sentýabr aýynyň ortalarynda geçirilmegi meýilleşdirilýän «Koreýa – Merkezi Aziýa» birinji sammitiniň öňüsyrasynda Günorta Koreýanyň Halkara hyzmatdaşlyk agentligi (KOICA) Gazagystanyň “KazAID” guramasy bilen bilelikde sebit ýurtlarynyň wekilleri üçin iki hepdelik hünär kämilleşdiriş maksatnamasyny gurady. Türkmenistanyň, Özbegistanyň, Gyrgyzystanyň we Täjigistanyň degişli ugurlaryna ýolbaşçylyk edýän 14 hünärmeni, şeýle hem “KazAID”-iň wekili Günorta Koreýanyň sanly hökümet modelini, «akylly şäherleri» dolandyrmak ulgamlaryny we ulag akymlaryny amatlylaşdyrmak usullaryny öwrenmek boýunça toplumlaýyn okuw geçdiler.
22-nji awgustda Sonnam şäherindäki KOICA-nyň okuw merkezinde tamamlanan maksatnama döwlet Baştutanlarynyň öňümizdäki duşuşygyna tehnologik esaslary taýýarlamak boýunça amaly ädim boldy. Gatnaşyjylar Seul şäheriniň ýol hereketi baradaky maglumat merkeziniň işini, şeýle hem sanly döwlet dolandyryşyna ýöriteleşdirilen interaktiw meýdançalaryň işini öwrendiler. Okuwyň esasy tapgyry diňe infrastruktura bilen tanyşmak bilen çäklenmän, eýsem Günorta Koreýanyň tehnologiýalaryny gatnaşyjy ýurtlaryň her biriniň sanlylaşdyrmak boýunça wezipelerine uýgunlaşdyrmak üçin aýratyn ýol kartalarynyň bilelikde işlenip taýýarlanylmagyndan ybarat boldy.
Sebit ýurtlarynyň Seulyň tehnologiýalaryna bolan gyzyklanmasy Koreýa Respublikasynyň IT ulgamyny özgertmekde dünýäde öňdebaryjy orun eýelemegi bilen şertlendirilýär. Birleşen Milletler Guramasynyň elektron hökümet boýunça baha bermegine görä, Günorta Koreýa raýatlar üçin onlaýn hyzmatlaryň hili boýunça dünýäde birinji, umumy dünýä reýtinginde bolsa dördünji orny eýeleýär. Okuwy guraýjylar umumy sanly standartlaryň we tejribe alyşmagyň Koreýa bilen Merkezi Aziýanyň arasynda bilelikdäki tehnologik kärhanalaryň döredilmegine hem-de ylmy hyzmatdaşlygyň giňeldilmegine itergi berjekdigine garaşýarlar.
