Özbegistanda yslam siwilizasiýasynyň mirasyna bagyşlanan halkara media-forumy geçiriler
24–28-nji awgust aralygynda Daşkentde we Samarkantda «Yslam siwilizasiýasy: täze garaýyş — täze açyşlar» atly halkara media-forumy geçiriler. Giň gerimli çäre dünýäniň 50 ýurdundan öňdebaryjy köpçülikleýin habar beriş serişdeleriniň, alymlaryň we bilermenleriň 300-e golaý wekillerini bir ýere jemlär.
Forumyň esasy maksady häzirki zaman tehnologiýalarynyň — sanly platformalaryň, interaktiw muzeý giňişlikleriniň we emeli aňyň kömegi bilen sebitiň baý taryhyny hem-de ruhy mirasyny halkara jemgyýetçiligine ýetirmekden ybarat.
Forumyň maksatnamasynyň esasy çäreleri we innowasiýalary:
• Dünýäniň iri media kompaniýalary: Maslahatlaşmalara we sessiýalara Euronews, CNN, BBC, Al Jazeera we TRT World neşirleriniň ýolbaşçylary hem-de bilermenleri gatnaşar.
• Taryhy öwrenmekde emeli aň: Gadymy arap golýazmalaryny tanamak üçin döredilen INKSIGHT AI modeliniň, şeýle hem Gündogaryň beýik alymlary Al-Horezmi, Ibn Sina we Ulugbegiň sanly awatarlarynyň tanyşdyrylyş dabaralary geçiriler.
• Aýratyn premýeralar: «Oskar» baýragynyň eýesi Ben Kingsliniň gatnaşmagynda Özbegistanyň taryhyna bagyşlanan film görkeziler. Şeýle hem Yslam siwilizasiýasy merkeziniň binasynyň öňünde multimediýa mapping şüweleňi geçiriler.
• Bilim we ýaşlar: Daşkentdäki 15 ýokary okuw mekdebinde daşary ýurtly öňdebaryjy žurnalistleriň ussatlyk sapaklary geçirilip, «Žurnalist-ýolbelet» atly okuw kursy ýola goýlar.
• Samarkant sapary: Täzeden dikeldilen Ymam Buharynyň ýadygärlik toplumyna we Hadys ylmy innowasiýa muzeýine barylmagy meýilleşdirilýär.
Forum Özbegistanyň döwlet garaşsyzlygynyň 35 ýyllygyna bagyşlanýar we ýurduň çuňňur medeni mirasyny hem-de amala aşyrylýan özgertmeleri halkara arenasynda görkezmäge gönükdirilendir.
ORIENT
