Gurbanguly Berdimuhamedow Halkara onkologiýa ylmy-kliniki merkeziniň gurluşygynda alnyp barylýan işler bilen tanyşdy
22-nji awgustda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Aşgabadyň demirgazyk künjeginde gurluşygy tamamlaýjy tapgyrda dowam edýän Halkara onkologiýa ylmy-kliniki merkezinde alnyp barylýan işler bilen tanyşdy. Döwrebap ylmy-kliniki merkezi Türkmenistanyň saglygy goraýyş we derman senagaty işgärleriniň hünär baýramynyň bellenilýän gününde açmak meýilleşdirilýär.
Gurbanguly Berdimuhamedow merkeziň binalar toplumynyň daşky görnüşini, onuň ýanaşyk ýerleriniň abadanlaşdyrylyş derejesini synlady we germaniýaly dünýä belli professor-lukmanlar Fritz Şpelsberg hem-de Sýuzanna Şpelsberg bilen gürrüňdeş boldy. Nemes hünärmenleri ornaşdyrylan enjamlaryň hiline ýokary baha berdiler. Olar köp sanly öňdebaryjy enjamlaryň sebitde ilkinji gezek ornaşdyrylýandygyny bellediler. Şeýle hem radioaktiw galyndylary zyýansyzlandyrmak we utilizasiýa etmek ulgamynyň dünýäniň standartlaryna doly laýyk gelýändigini nygtadylar.
Türkmen halkynyň Milli Lideri Türkmenistanyň Atom energiýasy boýunça halkara agentligi (AEHA) bilen hyzmatdaşlygynyň ulgamlaýyn häsiýete eýedigini nygtady. Munuň aýdyň subutnamasy hökmünde Gurbanguly Berdimuhamedowyň aprel aýynda Wenada AEHA -niň Baş direktory Rafael Grossi bilen geçiren duşuşygy görkezildi. Häzirki wagtda 2026 — 2030-njy ýyllar üçin tehniki hyzmatdaşlygyň ileri tutulýan ugurlaryny kesgitlejek ýurt boýunça täze Çarçuwaly maksatnamany taýýarlamak boýunça işler alnyp barylýar. Bu maksatnama ýadro lukmançylygynda innowasion tehnologiýalary ornaşdyrmak we tehnologik howpsuzlygy berkitmek üçin esas döreder.
Anyklaýyş, operasiýa we ylmy-barlag bölümleri bilen tanyşlygyň dowamynda emeli aň tehnologiýalaryny ornaşdyrmaga, maglumatlaryň bitewi sanly ulgamyny döretmäge hem-de ähli bölümlerde ýokary tizlikli internet birikmesini üpjün etmäge aýratyn üns berildi. Şeýle hem ýaş hünärmenleri taýýarlamak, kliniki ordinaturany ösdürmek, şeýle-de Oguz han adyndaky Inžener-tehnologiýalar uniwersitetiniň öňdebaryjy daşary ýurt ýokary okuw mekdepleri bilen dersara hyzmatdaşlygyny ösdürmek ileri tutulýan ugurlar hökmünde bellenildi.
Infrastrukturanyň ösüş depginine baha berip, Gurbanguly Berdimuhamedow paýtagtyň demirgazyk künjeginde Aşgabat şäheriniň günorta künjeginde döredilen saglyk şäherçesiniň nusgasynda täze saglyk şäherçesiniň gurulmagynyň maksadalaýyk boljakdygyny nygtady we degişli teklipleri ýurduň ýolbaşçylaryna hödürlemek boýunça taýýarlyk işlerini geçirmegi tabşyrdy.
