Alymlar takyk 3D modelirlemek üçin GeoPT okuw tehnologiýasyny döretdiler
Massaçusetts Tehnologiýa Institutynyň (MIT) we Sinhua uniwersitetiniň alymlary emeli aňy okatmagyň GeoPT atly täze usulyny işläp taýýarladylar. Bu innowasion tehnologiýa kompýuter modellerine fiziki kanunlara has çuňňur düşünmäge we hakyky dünýäde dürli obýektleriň özüni alyp barşyny ýokary takyklyk bilen wirtual görnüşde gaýtadan döretmäge mümkinçilik berýär diýip, BELTA habar berýär.
GeoPT ulgamy üç ölçegli mehaniki täsirleri wirtual görnüşde gaýtadan döredýär: bölejikleriň predmetler bilen galtaşanda hereketini we çaknyşmagyny görkezýär. Munuň netijesinde emeli aň ulgamy bar bolan meňzeş tehnologiýalara garanyňda iň ýokary takyklyk derejesine iki esse çalt ýetýär, şeýle hem ony doly derejede öwretmek üçin 60 göterim az maglumat gerek bolýar. Tehnologiýany ulanmak hem örän ýönekeý: inženeriň diňe obýektiň 3D modelini ýüklemegi we güýjüň tizligini hem-de ugruny görkezmegi ýeterlikdir. Soňra algoritm ähli fiziki reaksiýalary özbaşdak hasaplaýar.
Bu işläp taýýarlama inženerçilik we robototehnika üçin giň mümkinçilikleri açar. GeoPT-iň kömegi bilen hünärmenler awtoulaglaryň, uçarlaryň ýa-da robotlaryň çaknyşyklar wagtynda, şeýle hem ýeliň we suwuň täsiri astynda özlerini nähili alyp barjakdygyny öňünden çaklap bilerler. Bu bolsa täze tehnologiýalary synagdan geçirmegi ep-esli çaltlandyrmaga we taslama tapgyrynda olaryň howpsuzlygyny ýokarlandyrmaga mümkinçilik berer.
ORIENT
