Seul we Merkezi Aziýa ýurtlary ýokary derejeli konsultatiw edarasyny dörederler
2026-njy ýylyň 16-njy sentýabryna meýilleşdirilen taryhda ilkinji köptaraply «Koreýa – Merkezi Aziýa» sammitiniň geçirilmegine takmynan 40 gün galdy. Seulda Koreýa Respublikasynyň Daşary işler ministri Ço Hýonyň başlyklyk etmeginde Guramaçylyk komitetiniň jemleýji mejlisi geçirildi.
Mejlis Günorta Koreýanyň ugurdaş ministrlikleriniň, edaralarynyň we öňdebaryjy ykdysady düzümleriniň, şol sanda Koreýanyň Söwda-senagat edarasynyň hem-de Halkara söwda assosiasiýasynyň (KITA) ýolbaşçylaryny birleşdirdi. Guramaçylyk komiteti fewral aýynda başlanan taýýarlyk işleriniň jemlerini jemledi we resminamalaryň jemleýji toplumyny ylalaşdy.
Koreýanyň Daşary işler ministri Ço Hýonyň nygtaýşy ýaly, garaşylýan forum 2026-njy ýylda Seulyň kabul etjek ýeke-täk köptaraply sammiti bolar. Oňa sebitiň bäş döwletiniň ählisiniň — Türkmenistanyň, Gazagystanyň, Gyrgyzystanyň, Täjigistanyň we Özbegistanyň döwlet Baştutanlary gatnaşar.
80 millionlyk ilaty bolan, meýdany boýunça Koreý ýarym adasyndan 18 esse uly bolan, şeýle hem energetikanyň, esasy peýdaly gazylyp alynýan serişdeleriň uly çeşmesi we Demirgazyk-Gündogar Aziýany hem-de Ýewropany birleşdirýän logistika geçelgesiniň möhüm çatrygy bolan Merkezi Aziýa sebiti häzirki wagtda Seul tarapyndan esasy strategik hyzmatdaşlaryň biri hökmünde görülýär.
Öňde boljak ýokary derejeli sammitiň esasy mowzuklarynyň arasynda: energetika howpsuzlygyny we örän möhüm peýdaly gazylyp alynýan serişdeleriň üpjünçiliginiň durnuklylygyny berkitmek; üstaşyr-logistika infrastrukturany ösdürmek we sanlylaşdyrma; Koreýanyň iň iri korporasiýalarynyň gatnaşmagynda täze maýa goýum we söwda taslamalaryna badalga bermeklik bar.
Sentýabr aýyndaky gepleşikleriniň jemleri boýunça taraplaryň uzak möhletleýin strategik hyzmatdaşlyga geçilmegini berkidip, döwlet Baştutanlarynyň derejesindäki hemişelik işlejek konsultatiw edarasyny tassyklamaklaryna garaşylýar.
