Türkmenistan suw serişdelerini dolandyrmak we düýbüni çuňaltmak işleri boýunça Niderlandlaryň tehnologiýalaryna ünsüni çekýär
Türkmenistanyň Ministrler Kabinetiniň Başlygynyň orunbasary Taňryguly Atahallyýewiň ýolbaşçylygyndaky Hökümet wekiliýeti Niderlandlara amala aşyran saparynyň çäklerinde düýbüni çuňaltmak işleri, deňiz inženerçiligi we gidrologiýa bilimi boýunça dünýäniň öňdebaryjy kompaniýalarynyň ýolbaşçylary bilen birnäçe gepleşikleri geçirdi.
Kinderdeýkde wekiliýetiň agzalary gämi gurluşygy boýunça iri kompaniýa bolan “Royal IHC”-niň önümçilik desgalaryna baryp gördüler. Şeýle hem, “Damen Shipyards” kompaniýasynyň ýolbaşçylary bilen duşuşyklar geçirildi. Gepleşiklerde Türkmenistanyň suw hojalyk infrastrukturasyny döwrebaplaşdyrmak, esasy suw desgalarynda düýbüni çuňaltmak işlerini geçirmek hem-de ýöriteleşdirilen ýokary tehnologiýaly enjamlary ibermek meselelerine esasy üns berildi. Niderlandlaryň kompaniýalary Türkmenistanyň degişli edaralary bilen göni işewürlik gatnaşyklaryny ýola goýmaga taýýardyklaryny beýan etdiler.
Gepleşikleriň ylmy-bilim ugry Delft şäherindäki “IHE Delft” Suw bilimi institutynda dowam etdi. Bu ýerde türkmen tarapy institutyň rektory, professor Grem Juitt bilen duşuşdy. Taraplar bilelikdäki bilim maksatnamalaryny ýola goýmak, ylmy işgärleriň alyş-çalşyny guramak hem-de türkmen suw hojalyk hünärmenleri üçin hünär derejesini ýokarlandyryş okuwlaryny geçirmek meselelerini ara alyp maslahatlaşdylar.
Türkmenistan “IHE Delft” bilen ýurdumyzyň degişli ýokary okuw mekdepleriniň arasynda göni hyzmatdaşlygy ýola goýmagy teklip etdi. Şeýle hem, niderland kompaniýalary we bilermenleri bilelikdäki işewürlik çärelerine hem-de sentýabr aýynda Limburgda geçiriljek foruma gatnaşmaga çagyrdy.
