Rumyniýa türkmen gazy we logistika akymlary üçin merkez bolmaga taýýardygyny mälim etdi
Türkmenistanyň Rumyniýadaky ilçisi Annamämmet Annaýew 29-njy iýulda Rumyniýanyň Söwda-senagat edarasynyň ýolbaşçysy Mihai Daraban bilen resmi duşuşyk geçirdi. Duşuşygyň dowamynda taraplar ykdysady hyzmatdaşlygyň esasy ugurlaryny ara alyp maslahatlaşyp, energetika pudagyna we portlar arkaly göni hyzmatdaşlygy ösdürmäge aýratyn üns berdiler.
Gepleşikleriň dowamynda Rumyniýanyň Söwda-senagat edarasynyň ýolbaşçysy Mihai Daraban Hazar deňzi sebitiniň uglewodorodlaryny üstaşyr geçirmek boýunça AGRI (Azerbaijan–Georgia–Romania Interconnector) taslamasyny täzeden dikeltmäge gyzyklanma bildirýändigini aýtdy. Bu taslama türkmen tebigy gazyny Ýewropa bazaryna göni çykarmaga mümkinçilik berip biler. Mihai Darabanyň pikirine görä, Türkmenbaşy we Konstansa portlarynyň infrastrukturasyny Azerbaýjanyň hem-de Gruziýanyň logistika mümkinçilikleri, şeýle hem BRUA (Bulgaria–Romania–Hungary–Austria) gaz geçirijisi bilen utgaşdyrmak Hazar deňzi sebitinden Ýewropa energiýa serişdelerini ibermegiň esasy ugurlarynyň birine öwrülip biler.
Öz gezeginde Türkmenistanyň Rumyniýadaky ilçisi Annamämmet Annaýew türkmen ykdysadyýetiniň mümkinçilikleri barada maglumat berdi. Ol ýurduň jemi içerki önüminiň durnukly ösýändigini hem-de Türkmenistanyň tassyklanan tebigy gaz gorlary boýunça dünýäde öňdäki orunlaryň birini eýeleýändigini belledi. Ilçi Konstansa portunda türkmen önümleri üçin sebit boýunça paýlaýyş merkeziniň döredilmeginiň we port logistikasynyň ösdürilmeginiň iki ýurduň işewür toparlarynyň arasynda uzak möhletleýin söwda-ykdysady hem-de maýa goýum hyzmatdaşlygy üçin ygtybarly binýat döredjekdigini nygtady.
