OGT 2026 maslahatynyň esasy moderatory meşhur žurnalist Jon Defterios bolar
«Türkmenistanyň nebiti we gazy – 2026» (OGT 2026) atly 31-nji Halkara maslahatyna we sergisine taýýarlyk işleri täze tapgyra gadam basdy. «Energiýa. Hyzmatdaşlyk. Ösüş» şygary astynda geçiriljek giň gerimli forum 21–23-nji oktýabr aralygynda Aşgabatda geçiriler.
Guramaçylar dünýä derejesinde tanalýan žurnalist, ykdysady synçy we moderator Jon Defteriosyň forumyň esasy halkara moderatory hökmünde gatnaşjakdygyny tassykladylar. Ol sebitdäki möhüm energetika forumlarynyň birinde alyp baryjy hökmünde çykyş eder.
OGT 2026 maslahatyna taýýarlyk täze derejä çykýar
Jon Defteriosyň bellenilmegi forumyň taýýarlyk işleriniň birnäçe möhüm tapgyrlary bilen gabat geldi. Häzirki wagtda maslahata gatnaşmak üçin dünýäniň dürli ýurtlaryndan 150-den gowrak wekiliň gatnaşmagy tassyklanyldy, sergi meýdançalarynyň ählisi doly eýelenildi. Şeýle hem Azerbaýjan Respublikasynyň Döwlet nebit kompaniýasy SOCAR OGT 2026 maslahatynyň Premýer-hyzmatdaşlarynyň hataryna goşuldy.
Halkara abraý we hünär tejribesi
Jon Defterios dünýä ykdysadyýeti, energetika, halkara söwda we geosyýasat ugurlary boýunça ýöriteleşen iň abraýly halkara žurnalistleriň we moderatorlaryň biri hökmünde tanalýar.
Ol köp ýyllaryň dowamynda CNN Business teleýaýlymynyň ösüp barýan bazarlar boýunça halkara synçysy we redaktory bolup işledi (CNN Business Emerging Markets Editor). Onuň seljerme materiallary we geçiren söhbetdeşlikleri dünýä ykdysadyýeti, energetika howpsuzlygy, maýa goýum hyzmatdaşlygy we durnukly ösüş meselelerine bagyşlanan halkara maglumat giňişliginiň möhüm bölegine öwrüldi.
Hünär işiniň dowamynda Jon Defterios döwlet baştutanlary, hökümet ýolbaşçylary, ministrler, iri halkara energetika kompaniýalarynyň, maliýe institutlarynyň we dünýä korporasiýalarynyň ýolbaşçylary bilen söhbetdeşlikler geçirdi.
Öňdebaryjy halkara meýdançalardaky gatnaşygy
Dürli ýyllarda Jon Defterios Bütindünýä ykdysady forumynyň, OPEC-niň halkara seminarlarynyň, Atlantik Geňeşiniň Bütindünýä energetika forumynyň, ADIPEC halkara nebit we gaz sergisiniň we maslahatynyň, şeýle hem Halkara pul gaznasynyň (IMF) we beýleki abraýly guramalaryň çäreleriniň plenar mejlislerine we strategik maslahatlaryna moderatorlyk etdi.
Häzirki wagtda Jon Defterios Abu-Dabi şäherindäki Nýu-Ýork uniwersitetiniň biznes boýunça professory hem-de APCO Worldwide halkara konsalting kompaniýasynyň strategik uly geňeşçisi bolup işleýär.
OGT 2026 hünär gepleşikleriniň möhüm meýdançasyna öwrüler
Şeýle abraýly bilermeniň gatnaşmagy forumyň halkara derejesini mundan beýläk-de pugtalandyrmaga we maslahatlaşmalaryň ýokary hünär derejesinde geçirilmegini üpjün etmäge möhüm goşant goşar.
«OGT 2026 maslahatynyň alyp baryjysy we esasy halkara moderatory hökmünde gatnaşmak meniň üçin uly hormatdyr. Türkmenistan uly energetika serişdelerine, uzak möhletli hyzmatdaşlyk gatnaşyklaryna we öňdebaryjy energetika kompaniýalary bilen giňelýän hyzmatdaşlyga daýanýan sebit we dünýä energetika ulgamynda möhüm strategik orny eýeleýär.
Aşgabatda döwlet edaralarynyň ýolbaşçylary, pudak liderleri, maýadarlar we tehniki bilermenler bilen duşuşmaga, şeýle hem energetika pudagynyň geljegini kesgitleýän möhüm ugurlar boýunça netijeli dialoga goşant goşmaga sabyrsyzlyk bilen garaşýaryn» diýip, Jon Defterios belledi.
