Gurbanguly Berdimuhamedow Özbegistan bilen Senagat guşaklygyny we Ýokary geňeşi döretmegi teklip etdi
Aşgabat bilen Daşkendiň arasyndaky strategik dialog uzak möhletleýin iri taslamalaryň derejesine çykýar. Şu ýylyň 24-nji iýulynda Özbegistan Respublikasynyň Prezidenti Şawkat Mirziýoýew bilen geçirilen telefon arkaly söhbetdeşligiň dowamynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow sebitdäki integrasiýanyň täzelenen binýadyny emele getirmäge gönükdirilen birnäçe möhüm başlangyçlary beýan etdi.
Iki ýurduň paýtagtlarynda ýerleşýän «Aşgabat» we «Daşkent» seýilgähleri, Amyderýanyň üstündäki köprüler hem-de serhetýaka bilelikdäki söwda merkezi ýaly dostlugyň we ykdysady hyzmatdaşlygyň eýýäm hereket edýän simwolaryna daýanyp, taraplar hyzmatdaşlygyň has çuňlaşdyrylan täze görnüşlerini döretmäge taýýarlyk görýärler.
Esasy ädimleriň biri hökmünde Gurbanguly Berdimuhamedow Türkmenistan bilen Özbegistanyň arasynda senagat-tehnologik guşaklygyny kemala getirmek boýunça taslamanyň üstünde bilelikde işlemegi teklip etdi. Bu platforma iki ýurduň öndürijilerine ýokary tehnologiýalara esaslanýan önümçilikleri ýola goýmaga, eksporta gönükdirilen hem-de ýokary intellektual derejeli, dünýä bazarlarynda bäsdeşlige ukyply önümleri öndürmäge mümkinçilik berer.
Ýene bir bir strategik ugur bolsa türkmen-özbek serhedinde uly ulag we logistika merkeziniň döredilmegi bolar. Bu desga Gündogar – Günbatar ugry boýunça esasy üstaşyr geçelge hökmünde göz öňünde tutulýar we Aziýa bilen Ýewropanyň ulag ulgamlaryny gönüden-göni baglanyşdyrmaga hyzmat eder.
Bu giň gerimli başlangyçlaryň ählisini institusional esasda berkitmek maksady bilen, türkmen halkynyň Milli Lideri «Türkmenistan — Özbegistan» Ýokary geňeşini döretmegiň maksadalaýyk boljakdygyny belledi. Täze geňeş bilelikdäki taslamalaryň utgaşykly durmuşa geçirilmegini üpjün eder hem-de iki doganlyk ýurduň arasyndaky gatnaşyklary uzak möhletleýin we durnukly ösüş ýoluna çykarmaga ýardam berer.
