Seul bilen Aşgabat akylly suw dolandyryşy boýunça bilelikdäki taslamalaryň amaly tapgyryna geçýär
Seul, 23-nji iýul | ORIENT. Koreýa Respublikasynyň Daşary işler ministrligi hem-de Howa, energetika we daşky gurşaw ministrligi tarapyndan guralan Türkmenistanyň Hökümet wekiliýetiniň pudagara ýörite iş sapary Seul şäherinde üstünlikli tamamlandy. "ORIENT"-iň ozal giňişleýin habar berşi ýaly, degişli pudaklaryň hünärmenleriniň geçiren bilelikdäki maslahatlary Türkmenistanyň suw hojalygy ulgamyna koreýanyň sanly tehnologiýalaryny gönüden-göni ornaşdyrmak hem-de sentýabr aýynda geçirilmegi meýilleşdirilýän «Merkezi Aziýa – Koreýa Respublikasy» sammitine taýýarlyk görmek meselelerine bagyşlandy.
Türkmenistanyň toparynyň düzümine Suw hojalygy baradaky döwlet komitetiniň ýolbaşçy wekilleri, “Türkmensuwylmytaslama” türkmen döwlet suw hojalyk ylmy-önümçilik we taslama institutynyň hünärmenleri hem-de diplomatlar girdi. Iş saparynyň dowamynda türkmen hünärmenleri “K-water” döwlet korporasiýasynyň esasy dolandyryş merkeziniň işini, emeli aň tehnologiýalary bilen enjamlaşdyrylan öňdebaryjy “Hwasong” suw arassalaýyş desgasynyň mümkinçiliklerini, şeýle hem “Kýongin-Ara” kanalynyň gidrotehniki infrastrukturasyny jikme-jik öwrendiler. Esasy üns koreý hususy kompaniýalarynyň kanal ulgamyna sanly gözegçilik etmek, suw ýitgileriniň öňüni almak we awtomatlaşdyrylan süzgüç ulgamlary babatda hödürleýän innowasion çözgütleri bilen tanyşmaga gönükdirildi.
Saparyň maksatnamasy Koreýa bilen Merkezi Aziýa ýurtlarynyň arasynda suw senagaty boýunça hyzmatdaşlyk meselelerine bagyşlanan köptaraplaýyn duşuşygyň geçirilýän döwrüne gabat geldi. Gepleşikleriň dowamynda Koreýanyň Howanyň üýtgemegi boýunça ilçisi Gýon Çon Ho hem-de Suwdan peýdalanmak syýasaty boýunça baş müdir Kim Ho Yn sebit bilen alnyp barylýan dialog indi diňe nazaryýet derejesinden çykyp, ýokary tehnologiýaly enjamlary giň möçberde üpjün etmek we bilelikde desgalary gurmak tapgyryna geçýändigini bellediler.
Aşgabat bilen Seulyň arasynda geçen ýyl döwlet-hususy hyzmatdaşlygyň çäklerinde başlanan ikitaraplaýyn gatnaşyklar indi iri bilelikdäki maýa goýum we ekologik taslamalary durmuşa geçirmek üçin berk binýat döredýär.
Ýene-de tema boçunça
Koreýa we Merkezi Aziýa: — geljegiň strategiýasy hökmünde biri-birini doldurmaklyk
Duşanbede bilermenler “Merkezi Aziýa — Koreýa” birinji sammitiniň gün tertibini düzýärler
Merkezi Aziýa-Koreýa formaty özara düşünişmegiň täze derejesine çykýar
Günorta Koreýa Merkezi Aziýa üçin täze ykdysady strategiýany taýýarlaýar
