Tupan, balladalar we aglaýan skripka: «Melodiýa» orkestri «Watan» kinokonsert merkeziniň sahnasynda ýyldyzlary ýakdy
Aşgabadyň aýdym-saz durmuşy barha joşýar. Paýtagtymyzda ilkinji akordlardan başlap talapkär diňleýjileri özüne bendi edip bilýän täze, uly maksatlary öňünde goýýan döredijilik toparlary döreýär. Şeýle özüne çekiji merkezleriň biri nobatdaky gezek «Watan» kinokonsert merkezine öwrüldi. Bu ýerde ýaş bolsa-da eýýäm meşhurlyk gazanan «Melodiýa» orkestri doly tomaşaçy ýygnanan zalda «Ähli döwürleriň rowaýatlary» atly konsert maksatnamasyny hödürledi.
Bu agşam çylşyrymly instrumental sazlaşyklary we joşgunly estrada aýdymlaryny birleşdiren hakyky aýdym-saz baýramyna öwrüldi. Zal dessine mähirli we ynamly atmosfera beslendi. Tomaşaçylar ýerine ýetirijiler bilen bilelikde aýdym aýdyp, her çykyşdan soň şowhunly el çarpyşmalar bilen olary alkyşladylar.
2026-njy ýylyň başynda halkara bäsleşikleriniň ýeňijisi, zehinli dirižýor Annaoraz Döwletowyň we onuň kömekçisi Selbi Ýagşyýewanyň ýolbaşçylygynda döredilen orkestr gysga wagtyň içinde özboluşly döredijilik keşbini emele getirdi. «Melodiýa» orkestriniň esasy aýratynlygy batyrgaý döredijilik synaglary we žanr erkinligidir. Maestro bir maksatnamanyň çäginde akademiki takyklygy, milli öwüşgini we nostalgiýa döredýän estrada hitlerini ussatlyk bilen utgaşdyrýar.
Täze maksatnama toparyň döredijilik taýdan kämilleşendigini aýdyň görkezdi. Her eser täzeçe öwüşgin aldy, instrumental bölüm bolsa saz muşdaklary üçin hakyky sowgada öwrüldi. Agşamyň esasy açyşy grek kompozitory Ýanni Hrisomallisiň Wiwaldiniň «Tomus» temasyna esaslanyp döreden meşhur «Storm» kompozisiýasy boldy. Orkestr eseriniň tupanly joşgunyny doly açyp, skripkanyň klassiki täsirini häzirki zaman ritmleri bilen utgaşdyrmagy başardy.
Şeýle hem Selin Dionyň ýerine ýetirmeginde meşhur bolan «The Show Must Go On» aýdymynyň doly instrumental görnüşi tomaşaçylarda uly täsir galdyrdy. Baş solo partiýany dirižýoryň özi — Annaoraz Döwletow ýerine ýetirdi. Wokal bolmasa-da, saz gurallarynyň gamly hem dabaraly owazlary rok klassikasynyň beýikligini doly beýan etdi.
Liriki ruhy Geri Muryň «Parižiň köçeleri» kompozisiýasy we kompozitor Wladimir Kosmanyň «Bum» filminden meşhur «Reality» balladasy döretdi. Hut şol pursatda zalda aýratyn täsinlik emele geldi: sazandalar ilkinji akordlary ýerine ýetiren badyna tomaşaçylar telefonlarynyň yşyklaryny bir wagtda ýakdylar. Garaňkylykda haýal yrgyldap duran ýüzlerçe çyra parteri ýyldyzly asmana öwürdi. Şol ajaýyp yşyk ummanynda Scorpions toparynyň «Maybe I, Maybe You» balladasy hem simfoniki belentlige göterildi.
«Melodiýa» orkestriniň aýratyn buýsanjy türkmen saz mirasyna hormat bilen, şol bir wagtda döredijilikli çemeleşmegidir. Bu agşam sahnada meşhur «Duran ýerleri» sazy ýaňlanyp, tomaşaçylary haýran galdyrdy. Milli bölümiň iň täsirli pursaty bolsa Aýna Şirowanyň «Söýgi» atly kompozisiýasy boldy. Annaoraz Döwletow bu eser üçin ýörite estrada-orkestr görnüşindäki täze sazlaşygy taýýarlady. Solist Seýran Atanyýazowyň skripkasy şeýle bir täsirli ýaňlandy welin, tomaşaçylaryň köpüsi gözýaşlaryny saklap bilmedi.
Instrumental eserleriň täsirini joşgunly wokal çykyşlary dowam etdirdi. Konsertiň estrada bölümi dürli ýyllaryň altyn hitlerine bagyşlanan nostalgiýaly syýahata öwrüldi. Tomaşaçylar merhum Murat Nasyrowyň hatyrasyna ýerine ýetirilen «Men — seniň özüň» aýdymyny mähir bilen garşyladylar. Soňra bolsa 1990-njy we 2000-nji ýyllaryň meşhur hitleriniň ritmlerine goşulyp, «Tans et, ýaş wagtyň», «Gyzlar ýyldyzlar ýaly», «Kiçijik ýurt» aýdymlaryna uly höwes bilen bilelikde aýdym aýtdylar. Şeýle hem gündogar äheňli «Aý, Jennet» aýdymy we «Disko tansçysy» hindi filminden meşhur «Zubi-zubi» aýdymy agşama aýratyn öwüşgin çaýdy.
Bu agşam sahnada paýtagtymyzyň iň ökde aýdymçylary we sazandalary — ýaş Mustafa Ýagşyýew, maestro Annaoraz Döwletow, skripkaçy Seýran Atanyýazow hem-de beýleki ussat artistler çykyş etdiler. Olaryň her biri tomaşaçylaryň «Bis!» diýen gyzgyn alkyşlaryna mynasyp boldy.
Orkestriň wepaly muşdaklary üçin bu konsert toparyň ösüşindäki möhüm tapgyr boldy. Ilkinji çykyşlaryndan bäri «Melodiýa» özüni batyrgaý döredijilik synaglaryny geçirýän topar hökmünde tanatdy. Aşgabatlylar şu ýylyň ýazynda geçirilen üçünji konsertini hem gowy ýatlaýarlar. Şonda Emir Baýramgeldiýew bilen Döwran Şammyýew estrada sahnasynda uly üstünlik gazanyp, ýaşlaryň söýgüsini gazanypdylar. Şeýle hem şol maksatnamalarda Bahar Durdyýewa bilen Baky Annamyradow ajaýyp çykyş edipdiler. Häzirki wagtda bolsa «Melodiýa» doly kemala gelen döredijilik toparyna öwrüldi. Her çykyş özboluşly dramaturgiýasy bolan kiçijik sahna eserini ýatladýar.
Konsert tamamlanandan soň tomaşaçylar diňe bir ajaýyp ruhubelentlik bilen däl, eýsem milli ýerine ýetirijilik sungatyna bolan buýsanç duýgusy bilen hem öýlerine dolandylar. «Melodiýa» orkestri ýene-de bir gezek janly saz bilen tüýs ýürekden ýerine ýetirişiň islendik diňleýjiniň kalbyna ýol tapýan umumy dil bolup galýandygyny subut etdi.
Aýna Ýolbarsowa
