Türkmenistanyň Halk Maslahatynyň nobatdaky mejlisiniň geçiriljek senesi bellenildi
Halk häkimiýetiniň iň ýokary wekilçilikli edarasy — Türkmenistanyň Halk Maslahatynyň nobatdaky mejlisi 2026-njy ýylyň 23-nji sentýabrynda geçiriler. Bu barada degişli Karara Türkmenistanyň Halk Maslahatynyň Başlygy Gurbanguly Berdimuhamedow çarşenbe güni geçirilen Türkmenistanyň Halk Maslahatynyň Prezidiumynyň mejlisinde gol çekdi.
Forum Aşgabat şäherindäki Maslahat köşgünde geçiriler.
Gol çekilen resminama laýyklykda, welaýatlaryň, Aşgabat we Arkadag şäherleriniň halk maslahatlaryna 2026-njy ýylyň 1-nji sentýabryna çenli umumymilli forumyň işine gatnaşjak jemgyýetçilik wekilleriniň sanawyny Türkmenistanyň Halk Maslahatynyň Diwanyna bermek tabşyryldy.
Prezidiumyň ikinji Karary bilen öňde boljak Türkmenistanyň Halk Maslahatynyň mejlisini dabaraly ýagdaýda we ýokary guramaçylykly geçirmek maksady bilen guramaçylyk topary döredildi. Şu ýyl ýurduň esasy umumymilli forumy Türkmenistanyň Garaşsyzlygynyň 35 ýyllyk baýramy mynasybetli geçiriler.
Türkmenistanyň Halk Maslahatynyň Diwany Mejlis bilen bilelikde Türkmenistanyň Halk Maslahatynyň mejlisine taýýarlyk görmek we ony geçirmek bilen bagly işlerde welaýatlaryň, etraplaryň hem-de şäherleriň halk maslahatlaryna guramaçylyk-usulyýet taýdan ýardam bermek we bu işleri utgaşdyrmak tabşyryldy.
