Türkmenistanyň Prezidenti medeniýet ministrini we «Türkmengeologiýa» DK-nyň başlygyny çalyşdy, welaýatlaryň ýolbaşçy düzümlerinde hem üýtgeşmeleri geçirdi
10-njy iýulda, anna güni geçirilen Ministrler Kabinetiniň mejlisiniň dowamynda Prezident Serdar Berdimuhamedow Hökümetiň düzümlerinde, döwlet edaralarynda, welaýatlaryň dolandyryş edaralarynda we köpçülikleýin habar beriş serişdelerinde işgärler düzümine degişli birnäçe Permana hem-de resminama gol çekdi.
Nebitgaz pudagynda Gurbangeldi Garlyýew başga işe geçmegi sebäpli «Türkmengeologiýa» döwlet korporasiýasynyň başlygy wezipesinden boşadyldy. «Türkmengeologiýa» döwlet korporasiýasynyň başlygy wezipesine ozal «Türkmengaz» döwlet konserniniň başlygynyň orunbasary wezipesinde işlän Berdimyrat Amanow bellenildi.
Medeniýet ulgamynda Atageldi Şamyradow işde goýberen düýpli kemçilikleri üçin Türkmenistanyň medeniýet ministri wezipesinden boşadyldy. Türkmenistanyň medeniýet ministri wezipesine 6 aý synag möhleti bilen ozal Türkmenistanyň medeniýet ministriniň orunbasary bolup işlän Gurbanmyrat Myradalyýew bellenildi.
Işgärler düzüminiň üýtgedilmegi köpçülikleýin habar beriş serişdelerine hem degişli boldy. «Nesil» gazetiniň baş redaktory Artykguly Hojaberdiýew işde goýberen düýpli kemçilikleri üçin wezipesinden boşadyldy. Gazetiň täze baş redaktory wezipesine 6 aý synag möhleti bilen Hallygözel Şanazarowa bellenildi.
Şeýle hem ýurduň welaýatlarynyň dolandyryş edaralarynyň ýolbaşçy düzümlerinde birnäçe möhüm işgärler çalşygy geçirildi. Hojamyrat Aşyrmyradow Lebap welaýatynyň häkimi wezipesine bellenilip, ol Balkan welaýatynyň häkimi wezipesinden boşadyldy.
Balkan welaýatynyň häkimi wezipesine ozal Ahal welaýatynyň Ak bugdaý etrabynyň häkimi wezipesinde işlän Röwşen Jumaýew bellenildi. Ak bugdaý etrabynyň häkimi wezipesine bolsa şu etrabyň häkiminiň orunbasary wezipesinde işlän Ezizgeldi Aşyrow bellenildi.
Türkmenistanyň Suw hojalygy baradaky döwlet komitetiniň başlygy Durdy Genjiýew Lebap welaýatynyň häkimi wezipesinden boşadyldy.
Bulardan başga-da, başga işe geçmegi sebäpli Döwranberdi Annaberdiýew Mary welaýatynyň häkimi wezipesinden boşadyldy. Mary welaýatynyň häkimi wezipesine Batyr Orazgylyjow bellenildi.
