Türkmenistan bilen Türkiýe deňiz gatnawlaryny we Hazar sebitindäki hyzmatdaşlygy ösdürmegiň meselelerini ara alyp maslahatlaşdylar
Türkmenistanyň Deňiz we derýa ulaglary döwlet gullugynyň başlygy Azat Şanazarow Türkiýäniň 5-nji Deňiz sammitiniň çäklerinde Türkiýäniň ulag we infrastruktura ministri Abdulkadir Uraloglu bilen duşuşyk geçirdi. Taraplar iki ýurduň arasynda deňiz gatnawlaryny ösdürmegiň geljegini hem-de ulag-logistika ulgamyndaky hyzmatdaşlygy giňeltmegiň mümkinçiliklerini ara alyp maslahatlaşdylar.
Duşuşygyň dowamynda gämi gatnawyny ösdürmek, port infrastrukturasyny döwrebaplaşdyrmak we Hazar deňzi sebitindäki ulag aragatnaşyklaryny berkitmek meselelerine aýratyn üns berildi. Duşuşygyň netijeleri barada Abdulkadir Uraloglu özüniň X sosial torundaky sahypasynda habar berdi.
«Biz deňiz pudagyndaky ýakyn hyzmatdaşlygyň üsti bilen Türkiýe bilen Türkmenistanyň arasyndaky berk dostlukly gatnaşyklary mundan beýläk-de pugtalandyrarys» diýip, türkiýeli ministr belledi.
Türkiýäniň 5-nji Deňiz sammiti deňiz ulaglaryny, port infrastrukturasyny, gämi gatnawyny hem-de halkara hyzmatdaşlygyny ösdürmegiň möhüm ugurlaryny ara alyp maslahatlaşmak üçin döwlet edaralarynyň, işewür toparlaryň we pudaklaýyn guramalaryň wekillerini bir ýere jemledi.
