Türkmen mugallymlary Bolgariýada geçirilýän Erasmus+ forumynda sanly innowasiýalary öwrenýärler
Türkmenistanyň Döwlet energetika institutynyň mugallymlary 2026-njy ýylyň 20–30-njy iýuny aralygynda Bolgariýanyň Angel Kynçew adyndaky Ruse uniwersitetinde geçirilýän halkara ylym-bilim çärelerine gatnaşýarlar. Iş sapary Ýewropanyň Erasmus+ akademiki alyş-çalyş maksatnamasynyň çäklerinde guralyp, ýokary bilimi döwrebaplaşdyrmaga gönükdirilendir. Bu barada Türkmenistanyň Bilim ministrliginiň resmi saýtynda habar berildi).
Türkmen hünärmenleriniň saparynyň esasy maksady öňdebaryjy mugallymçylyk çemeleşmelerini öwrenmek, innowasion okatmagyň usullary boýunça tejribe alyşmak hem-de okuw işine sanly tehnologiýalary ornaşdyrmakdan ybaratdyr. Foruma dünýäniň 10 ýurdundan 13 sany ýokary okuw mekdebiniň wekilleri, şol sanda Fransiýadan, Türkiýeden, Çernogoriýadan we Müsürden gelen hünärmenler gatnaşýarlar. Forumyň ilkinji gününde gatnaşyjylar öz ýokary okuw mekdepleriniň ylmy we bilim ugurlaryndaky gazananlaryny tanyşdyrdylar.
Iş duşuşyklarynyň esasy mowzuklary emeli aňyň bilim ulgamyna ornaşdyrylmagy, okatmagyň garyşyk we interaktiw modelleriniň ulanylmagy, şeýle hem uniwersitetleriň halkara bäsdeşlige ukyplylygyny ýokarlandyrmak boldy.
Şol bir wagtyň özünde saparyň çäklerinde kompýuter ulgamlary we tehnologiýalary boýunça «CompSysTech'26» atly abraýly halkara ylmy maslahat hem geçirilýär. Bu meýdançada dünýäniň alymlary kiberhowpsuzlyk, bulut tehnologiýalary, sanly özgertmeler we IT ulgamlary boýunça iň täze ylmy barlaglary ara alyp maslahatlaşýarlar. Türkmenistanyň mugallymlary daşary ýurtly kärdeşleri bilen bilelikdäki ylmy taslamalaryň geljegini we akademiki hereketlilik maksatnamalaryny giňeltmegiň mümkinçiliklerini işjeň ara alyp maslahatlaşýarlar.
Erasmus+ maksatnamasynyň çäklerinde geçirilýän bu çärelere gatnaşmak ýurdumyzyň professor-mugallymlar düzüminiň hünär derejesini ýokarlandyrmaga hem-de Türkmenistanyň milli bilim ulgamynyň halkara abraýyny pugtalandyrmaga ýardam berýär.
ORIENT
