Brýusselde türkmen metbugat wekiliýeti bilen Türkmenistanyň Ýewropa Bileleşigindäki ilçisiniň arasynda gepleşik geçirildi
Brýusselde geçirilen metbugat syýahatynyň çäklerinde türkmen metbugat wekiliýeti Türkmenistanyň Belgiýadaky Adatdan daşary we Doly ygtyýarly ilçisi, şeýle hem ýurdumyzyň Ýewropa Bileleşiginiň ýanyndaky wekilhanasynyň ýolbaşçysy Sapar Pälwanow bilen duşuşdy. Açyk gepleşik görnüşinde geçirilen duşuşykda Türkmenistan bilen Ýewropa Bileleşiginiň arasyndaky hyzmatdaşlygyň amaly ugurlary ara alnyp maslahatlaşyldy.
Türkmenistanyň Brýusseldäki ilçihanasy Türkmenistan bilen Ýewropa Bileleşiginiň arasyndaky syýasy we ykdysady hyzmatdaşlygy ösdürmek boýunça yzygiderli işleri alyp barýar. Esasy üns Ýewropa bilen Merkezi Aziýanyň arasyndaky ulag arabaglanyşygyny giňeltmäge, Gündogar–Günbatar üstaşyr ugurlaryny ösdürmäge hem-de Türkmenistanyň sebitleýin logistika we üstaşyr merkezi hökmünde ornuny pugtalandyrmaga gönükdirilendir.
Şeýle hem ykdysady we maýa goýum hyzmatdaşlygyny ösdürmäge aýratyn ähmiýet berilýär. Amaly gün tertibiniň çäklerinde energetika, durnukly ösüş we Ýewropanyň senagaty hem-de “ýaşyl” özgertmeler üçin möhüm ähmiýete eýe bolan strategik çig mal serişdeleri boýunça hyzmatdaşlyk mümkinçilikleri ara alnyp maslahatlaşylýar.
Diplomatik wekilhana Brýusselde geçirilýän birnäçe köptaraplaýyn duşuşyklaryň taýýarlanylmagyna we guralmagyna hem işjeň gatnaşýar. Hususan-da, Türkmenistanyň Belgiýadaky ilçihanasynyň başlangyjy bilen Belgiýanyň Premýer-ministriniň orunbasary we daşary işler ministri, şeýle hem Merkezi Aziýa ýurtlarynyň we Mongoliýanyň ilçileriniň gatnaşmagynda iş ertirlik nagary guraldy. Duşuşygyň dowamynda ykdysady, ulag we energetika hyzmatdaşlygy, şeýle hem strategik çig mal serişdeleri we durnukly ösüş ugurlaryndaky hyzmatdaşlyk meseleleri ara alnyp maslahatlaşyldy.
«Merkezi Aziýa – Ýewropa Bileleşigi» sebit formatynyň çäklerinde Türkmenistan umumy beýanatlardan anyk taslamalaryň we amaly hyzmatdaşlyk mehanizmleriniň durmuşa geçirilmegine geçilmegini yzygiderli goldaýar.
Metbugat syýahatyna gatnaşan žurnalistler Ýewropa institutlarynyň we diplomatik wekilhanalarynyň işi, şeýle hem Ýewropa Bileleşigi bilen Merkezi Aziýa ýurtlarynyň arasyndaky hyzmatdaşlygyň amaly gün tertibiniň emele gelişi bilen tanyşmaga mümkinçilik aldylar.
Bitaraplyk, deňhukuklylyk we özara hormat goýmak ýörelgelerine esaslanýan Türkmenistan Ýewropa Bileleşigi bilen oňyn gatnaşyklary ösdürmegini dowam etdirýär. Şunda ykdysady gatnaşyklary giňeltmäge, energetika hyzmatdaşlygyna we ulag arabaglanyşygyny ösdürmäge aýratyn üns berilýär.
Brýussel Ýewropa Bileleşigi bilen Merkezi Aziýa ýurtlarynyň arasyndaky dialogyň amaly esaslarynyň kemala gelýän esasy meýdançasy bolmagynda galýar. Bu işde Türkmenistanyň Ýewropa Bileleşiginiň ýanyndaky diplomatik wekilhanasy möhüm orun eýeläp, syýasy we ykdysady hyzmatdaşlygyň yzygiderli ösdürilmegine hem-de taraplaryň arasyndaky amaly hyzmatdaşlyk görnüşleriniň giňeldilmegine ýardam berýär.
ORIENT
