Türkmenistanyň we ABŞ-nyň bilim ulgamyndaky hyzmatdaşlygynyň Ýol kartasy täzelener
8-nji iýunda Türkmenistanyň Bilim ministrliginde ministriň orunbasary Azat Ataýewiň ABŞ-nyň Döwlet sekretarynyň orunbasary Sara Rojersiň ýolbaşçylygyndaky amerikan wekiliýeti bilen duşuşygy geçirildi. Bu barada Türkmenistanyň Bilim ministrligi habar berýär.
Gepleşikleriň esasy mowzugy ikitaraplaýyn gatnaşyklary çuňlaşdyrmak, akademiki hereketliligi giňeltmek hem-de ykdysadyýetiň häzirki zaman pudaklary üçin hünärmenleri taýýarlamakda sanly tehnologiýalary ornaşdyrmak boldy.
Amerikan tarapy türkmen bilim ulgamynda alnyp barylýan özgertmelerine, şol sanda ýokary okuw mekdeplerini 2052-nji ýyla çenli ösdürmegiň uzak möhletleýin strategiýasyny durmuşa geçirilmegine we ýurduň Lissabon konwensiýasyna goşulmagyna ýokary baha berdi.
Duşuşygyň dowamynda amerikan wekiliýeti birnäçe anyk teklipleri öňe sürdi. Olaryň hatarynda Kent döwlet uniwersiteti bilen hyzmatdaşlykda bilelikdäki MBA maksatnamalaryny ösdürmek, türkmen okuwçylarynyň FLEX alyş-çalyş maksatnamasyna gatnaşygyny giňeltmek, şeýle hem ynsanperwer gatnaşyklary berkitmek maksady bilen ABŞ-nyň bilim maksatnamalarynyň uçurymlarynyň institusional toruny döretmek bar.
Türkmen tarapy ABŞ-nyň öňdebaryjy tejribesini öwrenmäge uly gyzyklanma bildirýändigini aýtdy. Hususan-da, ýokary okuw mekdepleriniň halkara akkreditasiýasyna, SAT, TOEFL we GRE ýaly halkara derejesinde ykrar edilen synag gurallary arkaly bilim hiline baha bermäge, şeýle hem emeli aň tehnologiýalaryny okuwa ornaşdyrmak üçin Coursera we OpenAI ýaly iri sanly platformalar bilen hyzmatdaşlyga aýratyn üns berler.
Gepleşikleriň netijesinde hyzmatdaşlyk boýunça bilelikdäki Ýol kartasyny täzelemek barada karar kabul edildi. Täzelenen resminama sanly ekoulgamlary ösdürmek, emeli aň tehnologiýalaryny ornaşdyrmak we täze uniwersitetara taslamalary durmuşa geçirmek ýaly ileri tutulýan ugurlary öz içine alar. Bu bolsa türkmen-amerikan ynsanperwer hyzmatdaşlygyny hil taýdan täze derejä çykarmaga mümkinçilik berer.
ORIENT
