Türkmenistanda ýaşlaryň arasynda geçirilen iki günlük robototehnika bäsleşiginiň netijeleri jemlendi
30–31-nji maý aralygynda Türkmenistanyň Bilim ministrligi hem-de ýurdumyzyň Döwlet energetika instituty tarapyndan «Ýaşlaryň arasynda robototehnika» atly bäsleşigiň jemleýji tapgyry geçirildi. Iki gün dowam eden bu bäsleşik onlarça maksada okgunly ýaş inženerleri, IT işläp düzüjileri we tehniki ugurlaryň talyplaryny bir meýdançada jemledi. Bu barada Türkmenistanyň Bilim ministrliginiň resmi web sahypasynda habar berildi.
Akyl-paýhas bäsleşikleri dört esasy ugur boýunça geçirildi. Gatnaşyjylar iki günüň dowamynda robotlaşdyrylan ulgamlary taslamak, programma üpjünçiligini döretmek we olary ýygnamak boýunça başarnyklaryny görkezdiler. Ýokary bäsdeşlik şertlerinde çekeleşikli we gyzykly göreş alnyp baryldy. Ýapylyş dabarasynda garaşsyz eminler topary her ugur boýunça iň gowy ýaş hünärmenleri kesgitledi.
Bäsleşigiň ähli ýeňijileri we baýrakly orunlary eýelän gatnaşyjylary Türkmenistanyň Bilim ministrliginiň Hormat hatlary hem-de gymmat bahaly sowgatlay bilen sylaglanyldy. Jemleýji çäräniň baýramçylyk ruhuny institutyň «Kuwwat» döredijilik talyplar toparynyň taýýarlan aýdym-sazly we tansly çykyşlary has-da bezedi.
Robototehnika we IT pudagy häzirki wagtda türkmen ýaşlary üçin ileri tutulýan ugurlaryň birine öwrülýär. Şeýle tehnologik meýdançalaryň geçirilmegi geljegi uly oýlap tapyjylary irki döwürlerde ýüze çykarmaga mümkinçilik berýär. Gatnaşyjylaryň gazanan üstünlikleri ýurdumyzda ýokary tehnologiýalary özleşdirmek üçin ähli şertleriň döredilendigini, ýaş işläp düzüjileriň bolsa eýýäm häzirki wagtda dünýä ülňülerine laýyk gelýän innowasion taslamalary döretmäge taýýardygyny tassyklaýar.
ORIENT
