Hytaýda geljegiň 6G aragatnaşygy boýunça giň gerimli şäher synaglaryna badalga berildi
Hytaý Halk Respublikasynyň Senagat we maglumat tehnologiýalary ministrligi 6 GGs diapazonyndaky synag ýygylyk spektriniň ulanylmagyny resmi taýdan tassyklap, altynjy nesil torlarynyň giň gerimli meýdan synaglaryna ýaşyl yşyk berdi.
CCTV+ habar berşi ýaly, bu çözgüt telekommunikasiýalaryň ösüşinde örän möhüm tapgyr boldy. 6G aragatnaşygy boýunça barlaglar indi ýapyk ylmy merkezlerden çykyp, hakyky durmuş şertlerine — iri şäherleriň joşgunly köçelerine we uly senagat kärhanalaryna geçirilýär.
Synaglar üçin saýlanan orta ýygylyk diapazony pudak hünärmenleri tarapyndan seýrek, ýokary tizlikli we örän ýokary hilli serişde hökmünde häsiýetlendirilýär. Ol bir wagtda giň çäkli örtügi, maglumatlaryň ägirt uly geçirijilik ukybyny hem-de signalyň iň ýokary ygtybarlylygyny üpjün edýär.
Bu spektriň esasy amaly artykmaçlygy onuň eýýäm hereket edýän 5G infrastrukturasyna doly laýyk gelmegidir. Bu bolsa dünýä operatorlaryna taýýar önümçilik binýadyny ulanmaga, täze torlary ornaşdyrmak üçin çykdajylary ep-esli azaltmaga we ulanyjylar üçin geljekdäki geçişi mümkin boldugyça ýumşak hem-de duýulmaz etmäge mümkinçilik berer.
Häzirki wagtda Hytaý tehniki synaglaryň ikinji tapgyryny resmi taýdan işe girizdi. 2025-nji ýylda üstünlikli tamamlanan birinji tapgyrda ýurduň öňdebaryjy alymlary 300-den gowrak goragly patentlerden we esasy tehnologik çözgütlerden ybarat ägirt uly tehnologik binýady döretdiler.
Täze hökümet rugsady ýerli kärhanalary ähli önümçilik zynjyryny çalt taýýarlamaga itergi berer. Zawodlar ilkinji täjirçilik çipleriniň, ýöriteleşdirilen terminallaryň we täze görnüşli ölçeg enjamlarynyň önümçiligini tiz wagtda ýola goýmaly bolar.
Hytaýyň Ylymlar akademiýasynyň abraýly akademikleri altynjy nesil simsiz aragatnaşygynyň ösüş ýol kartasynyň eýýäm doly aýdyňdygyny belleýärler. Halkara çaklamalara görä, dünýä standartlaşdyryş prosesi ilkinji resmi standartlar toplumyny takmynan iki ýyldan taýýarlar.
Şondan soň öndürijilere ilkinji täjirçilik ulanyjy önümlerini we gajetlerini çykarmak üçin ýene birnäçe wagt gerek bolar. Dünýä boýunça 6G torlarynyň resmi täjirçilik işe goýberilişi takmynan 2030-njy ýylda garaşylýar. Seýrek ýygylyklaryň bölünip berilmegi Hytaýy tehnologik bäsleşikde pellehana golaýlaşdyryp, geljekdäki sanly ykdysadyýet, uçarmansyz ulaglar we akylly şäherler üçin berk binýat döredýär.
ORIENT
