Türkmenistanda galla oragy möwsüminiň başlanjak seneleri mälim boldy — orak 3-nji iýunda başlar
Türkmenistanyň Prezidenti Serdar Berdimuhamedow 22-nji maýda, anna güni geçiren Ministrler Kabinetiniň nobatdaky mejlisiniň dowamynda 2026-njy ýylyň galla oragy möwsümine resmi taýdan ak pata berdi we sebitler boýunça oraga başlamagyň tertibini tassyklady.
Döwlet Baştutanynyň kararyna laýyklykda, Ahal, Lebap we Mary welaýatlarynyň gallaçylary 3-nji iýunda bugdaý oragyna girişerler, Balkan we Daşoguz welaýatlarynyň ekerançylary bolsa bu möwsüme az-kem soňrak — 10-njy iýunda girişerler.
Asylly däbe görä, orak möwsümine hormatly ýaşulular meýdanlarda ak pata bererler. Onuň öňisyrasynda bolsa alymlaryň, tejribeli agronomlaryň we mehanizatorlaryň gatnaşmagynda ylmy-amaly maslahatlar geçiriler.
Galla oragynyňk möwsüminiň möhletleriniň bellenilmeginiň öňisyrasynda, wise-premýer Taňryguly Atahallyýewiň ýurduň oba-senagat toplumyndaky işleriň ýagdaýy baradaky jikme-jik hasabaty diňlenildi. Türkmenistanyň gowaça ekilen meýdanlarda hatarara bejergi, otag etmek we ýekelemek, mineral dökünler bilen iýmitlendirmek, ösüş suwuny tutmak işleri alnyp barylýandygy bellenildi.
Daşoguz welaýatynda şaly ekmek işleri geçirilýär, Lebap welaýatynda şaly ekmek möwsümine taýýarlyk görülýär. Şunuň bilen birlikde ýurduň ekerançylyk meýdanlarynda ýeralmanyň, gök-bakja önümleriniň öndürilýän möçberini artdyrmak hem-de bu önümler bilen içerki bazarlary ýeterlik möçberde üpjün etmek maksady bilen, ekerançylyk meýdanlarynda ýazlyk ekinlere agrotehnikanyň kadalaryna laýyklykda ideg etmek, hasyly ýygnap almak işleri alnyp barylýar. Prezident Serdar Berdimuhamedow möwsümleýin oba hojalyk işleriniň ähli toplumyny berk gözegçilikde saklamagy tabşyrdy we türkmen daýhanlaryna ýokary zähmet üstünliklerini arzuw etdi.
