Biziň yhlasymyz – adamlary ýakynlaşdyrmak
Habarlar
Makalalar
Media
Anons
Tehnologiýalar
Biz barada
Habarlaşmak üçin
||
Türkmenistanyň paýtagty resmi taýdan ÝUNESKO-nyň öwreniji şäherleriniň bütindünýä toruna (GNLC) goşuldy. 7-nji dekabrda Aşgabat şäheriniň häkimliginde ömrüniň tutuş dowamynda okamaga gönükdirilen halkara bileleşigine Aşgabat şäheriniň kabul edilendigini tassyklaýan güwänamany gowşurmak dabarasy geçirildi.
Aşgabadyň Bütindünýä toruna goşulyşmagy baradaky çözgüt 2025-nji ýylyň 4-nji dekabrynda kabul edildi. Türkmenistanyň paýtagty bilim, ylym ulgamlaryndaky ýokary görkezijileri we ähli ýaşdaky raýatlaryň okamaklary üçin şertleriň döredilendigi sebäpli dünýäniň 46 ýurdundan bolan 72 şäher bilen birlikde saýlandy.
Aşgabat şu ýyl ulgama goşulan 11 paýtagtyň hatarynda Lissabon, Kair, Er-Riýad we Buenos-Aýres bilen bilelikde girizildi. Türkmenistan ilkinji gezek öwreniji şäherleriniň bütindünýä toruna goşulan 12 ýurduň biri boldy.
Bu giňeltmäniň netijesinde 2013-nji ýylda işe girizilen bu tor häzirki döwürde dünýäniň 91 ýurdundan 425 şäheri birleşdirýär we dünýäde 500 milliona golaý adamyň yzygiderli bilim almagyna goldaw berýär.
ÝUNESKO täze agzalaryň ähli ýaşlar üçin bilim hukugyny durmuşa geçirmek ugrunda edýän tagallalaryna ýokary baha berýär. Konsepsiýa görä, öwreniji şäherler jemgyýetiň gündelik durmuşyna bilim bermegiň utgaşdyrylan şäherleridir: mekdeplerde, işe ýerlerinde, kitaphanalarda, muzeýlerde hem-de jemgyýetçilik ýerlerde okuw we ösüş mümkinçilikleri döredilýär.
ÝUNESKO-nyň wekilleriniň belleýşi ýaly, şeýle şäherler geljegiň gurluşynda möhüm orun eýeleýärler, sebäbi olar üýtgäp durýan zähmet bazarlarynyň talaplaryna laýyklykda hünärmenleriň hünär derejelerini ýokarlandyrmaga mümkinçilik döredýärler; telekeçiligi ösdürýärler; emeli aň döwründe zerur bolan başarnyklary kemala getirýärler we durnukly ösüşe hyzmat edýärler.
Aşgabadyň ÝUNESKO-nyň Öwreniji şäherleriniň bütindünýä toruna kabul edilmegi Türkmenistanyň adam maýasyny ösdürmek we bilim hem-de innowasiýalara esaslanýan jemgyýeti döretmek ugrunda edýän tagallalarynyň halkara derejesinde ykrar edilmeginde möhüm ädimdir.
ORIENT
