Türkmenistan we Ýaponiýa “Merkezi Aziýa + Ýaponiýa” dialogynyň Liderleriniň taryhda ilkinji gezek geçiriljek sammitine taýýarlyk işlerini çaltlandyrmak meýillerini tassykladylar. Bu 25-nji noýabrda Türkmenistanyň Tokiodaky Ilçisi Atadurdy Baýramowyň Ýaponiýanyň Daşary işler ministriniň orunbasary Eri Arfiýa bilen geçirilen duşuşykdan soň mälim boldy.

Gepleşikleriň dowamynda taraplar halkara giňişliginde ýakyndan hyzmatdaşlyk etmäge taýýardyklaryny tassyklamak bilen çäklenmän, eýsem, mümkin boldugyça gysga wagtda “Merkezi Aziýa + Ýaponiýa” dialogynyň sammitini geçirmek üçin bilelikde işleri dowam etdirjekdiklerini hem aýratyn nygtadylar.

Hakykatdan hem Ýaponiýanyň öňdebaryjy KHBS-niň habarlary bu ýokary syýasy derejeli duşuşygyň ähmiýetini tassyklaýar.

“Jiji Press” we “NHK” habarlar agentlikleriniň berýän maglumatlaryna görä, Premýer-ministr Sanae Takaiçiniň ýolbaşçylygyndaky Ýaponiýanyň Hökümeti Gazagystanyň, Gyrgyzystanyň, Täjigistanyň, Türkmenistanyň we Özbegistanyň Liderleri bilen 2025-nji ýylyň dekabr aýynyň ortalarynda Tokioda geçirilmegine garaşylýan ilkinji sammite taýýarlyk işlerini tamamlaýjy tapgyrda alyp barýarlar.

Sammit ykdysady howpsuzlygy berkitmek hem-de infrastruktura we dekarbonizasiýa ýaly strategik ugurlarda hyzmatdaşlygy giňeltmek üçin uzak möhletleýin hyzmatdaşlygy ministrler derejesinden döwlet/hökümet Baştutanlary derejesine çenli ýokarlandyrmagy maksat edinýär.

Ikitaraplaýyn dialogyň çäginde Ilçi Atadurdy Baýramow Ýaponiýanyň DIM-niň orunbasary Eri Arfiýa bilen 2025-nji ýylyň dekabrynda Aşgabada geçirilmegi meýilleşdirilýän Türkmenistanyň hemişelik Bitaraplygynyň 30 ýyllygyna bagyşlanan dabaralara ýokary derejeli ýapon wekiliýetiniň gatnaşmagyny hem ara alyp maslahatlaşdy.

ORIENT