Biziň yhlasymyz – adamlary ýakynlaşdyrmak
Habarlar
Makalalar
Media
Anons
Tehnologiýalar
Biz barada
Habarlaşmak üçin
||
Aşgabat, 2025-nji ýylyň 26-njy noýabry — Bütindünýä Saglygy Goraýyş Guramasynyň (BSGG) Türkmenistandaky ýurt edarasynyň, Türkmenistanyň Bilim ministrliginiň (TBM) hem-de Türkmenistanyň Saglygy goraýyş we derman senagaty ministrliginiň (TSGDSM) hyzmatdaşlygy bilen orta mekdep okuwçylary üçin taýýarlanan innowasion sanly oýun platformasy — «Immun gözegçiligi» tanyşdyryldy.
Çärä TBM-niň, TSGDSM-niň, Bilim institutynyň, birnäçe BMG edaralarynyň wekilleri, synag mekdepleriň biologiýa mugallymlary, milli bilim ulgamynyň hünärmenleri we bilim hem-de saglygy goraýyş pudaklaryndaky möhüm hyzmatdaşlary gatnaşdy. Bu bolsa ýurdumyzda sanly bilim ulgamyny ösdürmek we saglygy berkitmek ugruna ygrarlylygyny görkezýär.
BSGG-niň Ýewropa sebitleýin edarasynyň hem-de Gazagystandaky ýurt edarasynyň hünärmenleri «Immun gözegçilik» ulgamy üstünlikli ornaşdyrylan ýurtlaryň tejribesi bilen paýlaşdylar. Şeýle hem okuwçylaryň gyzyklanmasyny artdyrmakda hem-de saglyk boýunça çylşyrymly meseleleri düşnükli aýdyňlaşdyrmakda netijeli guraldygyny belläp geçdiler. Myhmanlara 6 moduldan ybarat «Immun gözegçilik» platformasy görkezildi. Ol sanly oýunlary, synp-ders çärelerini, animasion mazmuny we amaly simulýasiýalary özünde jemleýär. Platforma okuwçylara sagdyn durmuş ýörelgeleri, immunologiýanyň esaslary we sanjymlaryň bedeni nähili gorap saklaýandygy boýunça düşünje berýär. Mundan başga-da, çagalaryň tankydy pikirlenmek ukybyny ösdürmek arkaly, olaryň lukmançylyk maglumatlaryny dogry seljermäge we galp maglumatlary tanamaga mümkinçilik döredýär — häzirki sanly toplumda bu ukyplar aýratyn ähmiýete eýedir.
Bu başlangyç BSGG-niň we Ýewropa Bileleşiginiň Merkezi Aziýada COVID-19 ýaýramagyna jogap bermek boýunça bilelikdäki taslamasynyň (II tapgyr) çäginde durmuşa geçirilýär. Taslama ýurtlaryň lukmançylyk sowatlylygyny ýokarlandyrmagyna, jemgyýetçilik durnuklylygyny pugtalandyrmagyna hem-de ylmy esasly jemgyýetçilik saglygy goraýyş çärelerini ilerletmegine goldaw berýär.
«Immun gözegçiligi» atly elektron platformanyň Türkmenistanyň mekdep bilimi ulgamyna ornaşdyrylmagy bilen, okuwçylaryň saglyk barada habardarlylygy artar, sanjymlaryň ygtybarlylygy we täsirliligi baradaky ynam pugtalanar diýlip garaşylýar. Bu başlangyç jemgyýetçilik saglygynyň uzak möhletleýin berkidilmegine hem-de geljekki nesli sagdyn we howpsuz durmuş üçin zerur bilimler bilen üpjün etmäge gönükdirilendir.
ORIENT
