Biz ýakynlaşmagy ugur edinýäris

Türkmenistanyň Daşary işler ministri Raşid Meredow BMG-niň Baş Assambleýasynyň 79-njy mejlisiniň çäklerinde birnäçe ikitaraplaýyn duşuşyklary geçirdi.

27-nji sentýabrynda Kipr Respublikasynyň Daşary işler ministri Konstantinos Kombos bilen geçirilen duşuşykda taraplar iki ýurduň arasyndaky hyzmatdaşlygyň derejesine baha berdiler, söwda-ykdysady ulgamynda hyzmatdaşlygyň mümkinçilikleri barada, şeýle hem ylym we bilim ulgamynda, esasanam akademiki alyş-çalyş hem-de talyplary okatmak boýunça pikir alyşdylar.

Duşuşygyň dowamynda daşary işler ministrlikleriniň arasynda özara düşünişmek hakynda we syýasy geňeşmeleri geçirmek hakynda degişli Ähtnamalary işläp-düzmäge, şeýle hem iki ýurduň jogapkär edaralarynyň arasyndaky söwda-senagat hyzmatdaşlygyny ösdürmäge taýýarlyk beýan edildi.

Şeýle hem Türkmenistanyň daşary syýasat edarasynyň ýolbaşçysy Yrak Respublikasynyň Premýer-ministriniň orunbasary, Daşary işler ministri Fuad Muhammed Huseýn bilen duşuşdy. Duşuşygyň dowamynda ministrler “swap” usuly boýunça meýilleşdirilýän Yraga türkmen tebigy gazyny ibermek babatynda giňişleýin pikir alyşdylar.

Türkmenistanyň Daşary işler ministri Raşid Meredow Hindistanyň Daşary işler ministri Subramanýam Jaýşankar bilen geçiren duşuşygynyň barşynda ikitaraplaýyn saparlary guramak we söwda, ykdysady, ylmy we tehnologiki hyzmatdaşlyk boýunça hökümetara türkmen-hindi toparynyň nobatdaky mejlisine taýýarlyk barada maslahatlaşdylar.

Ministrler energetika hyzmatdaşlygy we iri infrastruktura taslamalaryny durmuşa geçirmegiň meselesini ara alyp maslahatlaşdylar hem-de Türkmenistan-Owganystan-Pakistan-Hindistan gaz geçirijisiniň möhüm oruny we sebit üçin ähmiýeti bellenildi.

ORIENT news

Foto: mfa.gov.tm