Ekrana derek AR äýnekli ilkinji noutbuk tanyşdyryldy

06.06.2024 | 12:32 |

Sightful adaty bolmadyk ilkinji Spacetop G1 noutbuguny tanyşdyrdy.

Bu enjamda ekrana derek AR äýnekler ulanylýar. Bu äýnekleriň 1920x1080 2 sany OLED displeýi bar. Şolaryň netijesinde ulanyjy 100 dýum ölçegdäki iş gurşawyna eýe bolýar.

Adaty noutbuglar ýaly Spacetop G1 hem klawiatura we trekpad bilen üpjün edilendir. Goşmaça enjamlary birikdirmek üçin 2 sany USB-C girişi göz öňünde tutuldy. Enjam Space OS operasion ulgamynda işleýär.

Täze kompýuter 3-nji nesil Snapdragon 8cx 3 prosesoryň binýadynda döredildi we 16 GB OZU hem-de 128 GB toplaýjy bilen üsti ýetirildi. Onuň batereýasy 8 sagat işläp bilýär. Şeýle hem 63 BT kuwwatyndaky adapter göz öňünde tutuldy.

Sightful kompaniýasynyň direktory Tamir Berlineriň aýtmagyna görä, Spacetop G1 ulanyjylary 14 dýumlyk ekranlar bilen çäklendirmelerden azat eder. Enjamy işläp taýýarlan inženerleriň Microsoft, Apple, Magic Leap ýaly kompaniýalarda iş tejribeleri bar.

Spacetop G1 noutbuguny kompaniýanyň saýtynda sargyt edip bolýar.

ORIENT news